इरानले कुवेत अन्तर्राष्ट्रिय विमानस्थललाई लक्षित गरी गरेको आक्रमणमा एक जनाको मृत्यु हुनुका साथै ६३ जना घाइते भएका छन्। घटनापछि विमानस्थल केही समयका लागि बन्द गरिएको कुवेती अधिकारीहरूले बताएका छन्। अप्रिल ८ मा लागू भएको युद्धविरामपछि खाडी क्षेत्रमा भएको यो पहिलो घातक आक्रमण मानिएको छ।
कुवेतका अनुसार आक्रमणबाट केही कूटनीतिक नियोगहरूमा समेत क्षति पुगेको छ। यस घटनाले युद्धविरामपछि तुलनात्मक रूपमा शान्त बनेको क्षेत्रीय अवस्थामाथि नयाँ दबाब सिर्जना गरेको छ। अमेरिका र इजरायलले इरानमाथि गरेको आक्रमणपछि सुरु भएको एक महिनाभन्दा लामो युद्धका क्रममा इरानले खाडी क्षेत्रका विभिन्न मुलुकतर्फ हजारौं मिसाइल र ड्रोन प्रहार गरेको थियो।
इरानले कुवेत र बहराइनले अमेरिकी सेनालाई आफ्नो भूमि प्रयोग गर्न दिएको आरोप लगाउँदै बहराइनस्थित अमेरिकी नौसैनिक मुख्यालय तथा कुवेतको अली अल–सलेम हवाई अड्डालाई निशाना बनाएको जनाएको छ। तर कुवेत अन्तर्राष्ट्रिय विमानस्थलमा भएको आक्रमणबारे तेहरानले स्पष्ट विवरण सार्वजनिक गरेको छैन।
कुवेतको स्वास्थ्य मन्त्रालयका प्रवक्ता अब्दुल्लाह अल–सनादका अनुसार घटनास्थलमा २५ वटा एम्बुलेन्स परिचालन गरिएको थियो। घाइतेमध्ये केहीको अवस्था गम्भीर रहेको र उनीहरूलाई विभिन्न अस्पतालमा उपचारका लागि पठाइएको छ। स्वास्थ्य मन्त्रालयका अनुसार घाइतेहरूमा टाउकोमा गम्भीर चोट, मस्तिष्कमा रक्तस्राव, अंग विच्छेदन तथा विस्फोटबाट भएका अन्य गम्भीर चोटपटक देखिएका छन्।
