धनगढीमा सम्पन्न राष्ट्रिय अपाङ्ग महासंघ नेपाल, सुदूरपश्चिम प्रदेश समितिको अधिवेशनले नन्दराज भट्टको नेतृत्वमा नयाँ कार्यसमिति सर्वसम्मत चयन गरेको छ। अध्यक्षमा निर्विरोध चयन भएका भट्टले अपाङ्गता भएका व्यक्तिहरूको हक, अधिकार र समावेशी विकासका लागि संगठनलाई थप सशक्त बनाउने प्रतिबद्धता जनाएका छन्।
उपाध्यक्षमा निर्मला विष्ट, सचिवमा प्रेम बोहरा, सहसचिवमा रामप्रसाद जोशी र कोषाध्यक्षमा चेतराज भट्ट चयन भएका छन्। त्यसैगरी सदस्यहरूमा कमलसिंह धामी, शान्ति मल्ल, विष्णुरूपा आचार्य, नरेन्द्र विष्ट, गौरीशंकर चौधरी, मीना खत्री, दुर्गाकुमारी थापा र अंकित जोशी निर्विरोध चयन भएका छन्।
निर्वाचन अधिकृत गम्भीरसिंह ऐरका अनुसार सम्पूर्ण पदाधिकारी तथा सदस्यहरू सर्वसम्मत रूपमा चयन भएका हुन्। अधिवेशनमा केन्द्रीय कोषाध्यक्ष रमेशकुमार बस्नेत र केन्द्रीय सदस्य अर्जुन रावलको उपस्थिति रहेको थियो।
नवनिर्वाचित अध्यक्ष भट्टले प्रदेशमा करिब ७० हजार अपाङ्गता भएका व्यक्तिहरूको अधिकार सुनिश्चित गर्न शिक्षा, स्वास्थ्य, रोजगारी र सामाजिक सुरक्षामा पहुँच विस्तार गर्ने बताए। उनले अपाङ्गमैत्री नीति निर्माण र प्रभावकारी कार्यान्वयनका लागि सरकारसँग निरन्तर वकालत गर्ने प्रतिबद्धता व्यक्त गर्दै समावेशी समाज निर्माणमा जोड दिए।
