अमेरिकी सेनाले इरानभित्रका सैन्य ठेगानामाथि लगातार दोस्रो दिन पनि शक्तिशाली हवाई आक्रमण गरेपछि मध्यपूर्वमा युद्धको संकट गहिरिएको छ। जवाफमा इरानले विश्वकै अत्यन्त संवेदनशील व्यापारिक मार्ग ‘स्ट्रेट अफ होर्मुज’ पूर्ण रूपमा बन्द गरेको घोषणा गर्दै त्यहाँबाट गुड्ने व्यावसायिक जहाजहरूलाई निशाना बनाउने चेतावनी दिएको छ।
अमेरिकी राष्ट्रपति डोनाल्ड ट्रम्पले इरानमाथि अझ कडा आक्रमण गर्ने चेतावनी दिँदै तेहरानले शान्ति सम्झौताका लागि ढिलो गरिसकेको टिप्पणी गरेका छन्। अमेरिकी सेन्ट्रल कमान्डका अनुसार इरानको आक्रामक गतिविधिको जवाफस्वरूप आत्मरक्षाका लागि नयाँ हवाई कारबाही गरिएको हो। रक्षा मन्त्रालयले इरानी सैन्य क्षमतालाई कमजोर बनाउन लक्ष्य लिइएको जनाएको छ।
इरानको सरकारी मिडिया र इस्लामिक रिभोलुसनरी गार्ड्सले होर्मुजमा दुई जहाजमाथि प्रहार गरिएको दाबी गर्दै जलमार्ग पूर्ण रूपमा बन्द गरिएको घोषणा गरेका छन्। तर अमेरिकी पक्षले भने व्यावसायिक जहाजहरू अझै पनि उक्त मार्गबाट आवतजावत गरिरहेको जनाएको छ।
इरानको दक्षिणी क्षेत्र, क्युशम टापु, बन्दर अब्बास र सिरिक आसपास ठूलो विस्फोटको आवाज सुनिएको रिपोर्ट छ। यस घटनासँगै पहिलेको युद्धविराम पूर्ण रूपमा भंग भएको संकेत देखिएको छ, जसले क्षेत्रीय सुरक्षा संकट थप जटिल बनाएको छ।
