कैलालीको गोदावरी नगरपालिका–४ बासपानीकी धनादेवी धामीमाथि भएको घटनाले राज्य संयन्त्रको कारबाही शैली र मानवीय संवेदनशीलतामाथि गम्भीर प्रश्न उठाएको छ। वन कर्मचारीले उनको जीविकोपार्जनको आधार बनेको जीएसए टेम्पोलाई भिरमा खसालिदिएपछि उनी अहिले न्यायको खोजीमा छिन्।
धामीका अनुसार डिभिजन वन कार्यालय धनगढीका कर्मचारीले गाईमारेडाँडास्थित सडकछेउमा राखिएको टेम्पोबाट सामान झारेर सिधै भिरमा फालेका हुन्। सोही टेम्पोमार्फत उनी दैनिक व्यापार गर्दै परिवारको गुजारा चलाउँदै आएकी थिइन्। “गाडीबाट सामान झार्नुभयो, घर लैजान्छौँ भन्दा पनि मान्नुभएन,” उनले भावुक हुँदै भनिन्।
वन कार्यालयले अतिक्रमण नियन्त्रण अभियानअन्तर्गत ४७ वटा संरचना हटाएको जनाएको छ। तर स्थानीयले भने जीविकोपार्जनको साधन नै नष्ट गरिएको भन्दै आलोचना गरेका छन्। घटनाले कानुन कार्यान्वयन गर्दा मानवीय पक्षलाई बेवास्ता गरिएको आरोप उठाएको छ।
डिभिजन वन कार्यालयका सूचना अधिकारी जिवछ यादवले पटक–पटक हटाउन आग्रह गरिएको तर भिरमा फाल्ने नियत नभएको बताएका छन्। प्रमुख रामबिचारी ठाकुरको प्रतिक्रिया भने प्राप्त हुन सकेको छैन।
धामी अहिले एउटै प्रश्न दोहोर्याइरहेकी छन्—“मेरो अपराध के थियो ?” यो घटनाले राज्य संयन्त्रको निर्णय र नागरिकको जीवनबीचको दूरीबारे गम्भीर बहस सुरु गरेको छ।
