राष्ट्रिय स्वतन्त्र पार्टी (रास्वपा) का सांसद केपी खनालले कैलालीको लम्कीचुहा अस्पताल निर्माण तथा सञ्चालनमा नेपाली कांग्रेस नेतृत्वको प्रदेश र स्थानीय सरकारले अवरोध गरेको आरोप लगाएका छन्।
आइतबार प्रतिनिधि सभा बैठकमा बोल्दै उनले सर्वोच्च अदालतले अस्पताल निर्माणका लागि आदेश दिइसकेको भए पनि प्रदेश र स्थानीय तहमा कांग्रेसको नेतृत्व भएकै कारण काम अघि बढ्न नसकेको जिकिर गरे।
सांसद खनालले अस्पतालका कर्मचारीमाथि स्थानीय सरकारबाट दुर्व्यवहार र गालीगलौज भएको भिडियो सामाजिक सञ्जालमा सार्वजनिक भइरहँदा पनि कांग्रेस मौन बसेको भन्दै आपत्ति जनाए। उनले सदनमा सरकारको आलोचना गर्ने कांग्रेसले आफ्नै नेतृत्वका स्थानीय र प्रदेश सरकारका कमजोरीबारे किन नबोलेको भन्दै प्रश्न उठाए।
खनालले लम्कीचुहा अस्पतालमाथि भएको अन्यायबारे कांग्रेसले स्पष्ट धारणा सार्वजनिक गर्नुपर्ने माग समेत गरेका छन्।
