देशभर मनसुनी गतिविधि सक्रिय भएसँगै आज अधिकांश स्थानमा मौसम बदली रहने भएको छ। मौसमविद्का अनुसार पहाडी तथा तराई क्षेत्रका एक–दुई स्थानमा भारी वर्षाको सम्भावना रहेकाले सतर्कता अपनाउन आग्रह गरिएको छ।
आज दिउँसोपछि मधेश प्रदेश तथा लुम्बिनी र सुदूरपश्चिम प्रदेशका तराईका केही क्षेत्रमा हावाहुरी चल्ने सम्भावना रहेको छ। यसले जनजीवन, कृषि तथा सडक यातायातमा असर पार्न सक्ने भएकाले आवश्यक सावधानी अपनाउन मौसमविद्ले सुझाव दिएका छन्।
आज राति मधेश, कोशी, बागमती, गण्डकी र लुम्बिनी प्रदेशका पहाडी तथा तराईका थोरै स्थानमा भारी वर्षा हुन सक्ने पूर्वानुमान गरिएको छ। लगातारको वर्षाले नदी तथा खोलामा पानीको सतह बढ्न सक्ने भएकाले जोखिमयुक्त क्षेत्रमा विशेष सतर्कता अपनाउन आग्रह गरिएको छ।
बाढी पूर्वानुमान महाशाखाका अनुसार इलाम, झापा, तेह्रथुम, पाँचथर, धनकुटा, सप्तरी, सुनसरी, मोरङ, डोटी, डडेलधुरा तथा आसपासका जिल्लाबाट बग्ने साना नदी र खोलामा पानीको बहाव उल्लेख्य बढ्ने सम्भावना छ। ती क्षेत्रमा आकस्मिक बाढीको मध्यम जोखिम रहेकाले नदी किनार, तटीय बस्ती र कमजोर भूभागमा बसोबास गर्ने नागरिकलाई सतर्क रहन तथा अनावश्यक रूपमा नदी तर्न वा जोखिमयुक्त क्षेत्रमा नजान आग्रह गरिएको छ।
