अत्तरियाः डडेल्धुराको अमरगढी नगरपालिका–७ खसरेखानमा शनिबार बिहान बोलेरो जिप दुर्घटना हुँदा दुई जनाको मृत्यु भएको छ भने तीन जना घाइते भएका छन्। धनगढीबाट दार्चुलातर्फ जाँदै गरेको जिप बिहान करिब ३ बजे सडकबाट करिब ५०० मिटर तल भिरमा खसेर दुर्घटनामा परेको स्थानीयले बताएका छन्।
दुर्घटनाको सूचना प्राप्त हुनासाथ नेपाल प्रहरी, ट्राफिक प्रहरी र सशस्त्र प्रहरीको संयुक्त टोली घटनास्थल पुगेर उद्धार कार्य सञ्चालन गरेको थियो। घाइते पाँचै जनालाई तत्काल उपचारका लागि डडेल्धुरा अस्पताल पुर्याइएको थियो। उपचारकै क्रममा दुई जनाको मृत्यु भएको प्रहरीले जनाएको छ भने बाँकी तीन जनाको अस्पतालमा उपचार भइरहेको छ।
दुर्घटनाको कारण खुल्न बाँकी रहेको प्रहरीले जनाएको छ। मृतक र घाइतेहरूको पहिचानसहित घटनाबारे थप विवरण संकलन भइरहेको छ भने प्रहरीले दुर्घटनाबारे थप अनुसन्धान अघि बढाएको छ।
