अत्तरिया: “ग्रिन गोदावरी, क्लिन गोदावरी” तथा “हाम्रो नगर, सफा सुन्दर शहर” भन्ने मूल नारालाई आत्मसात् गर्दै गोदावरी नगरपालिकाको आयोजननामा गोदावरी आर्यघाटमा बृहत् सरसफाइ कार्यक्रम सम्पन्न गरेको छ।
गोदावारी नगरपालीकाका नगर प्रमुख बिरेन्द्र भट्ट स्वयं झाडु लिएर सरसफाइ अभियानमा सहभागी भएपछि कार्यक्रमले थप उत्साह र सन्देश दिएको थियो। नगरका जनप्रतिनिधि, कर्मचारी, सुरक्षाकर्मी तथा स्थानीयवासीको उल्लेखनीय सहभागितामा आर्यघाट परिसर र आसपासका क्षेत्रको फोहोर संकलन गरी सफाइ गरिएको थियो। सरसफाई कार्यक्रममा देवीदल गण तेघरी ब्यारेक अत्तरिया को सहकार्य रहेको थियो।
सरसफाई कार्यक्रममा बोल्दै गोदावारी नगरपालिकाका नगर प्रमुख बिरेन्द्र भट्टले भन्नुभयो, “सफा, हराभरा र व्यवस्थित गोदावरी निर्माण गर्ने अभियान कुनै एक दिनको कार्यक्रम होइन, यो हरेक नागरिकको साझा दायित्व हो। नगरपालिकाले थालेको अभियानलाई जनसहभागितासँग जोडेर निरन्तर अघि बढाउनेछौं। वातावरण संरक्षण, सार्वजनिक सम्पत्तिको सम्मान र स्वस्थ जीवनशैलीका लागि सबैले आफ्नो ठाउँबाट जिम्मेवारी निभाउन आवश्यक छ।”
साथै अन्तिम संस्कारका लागि ल्याएका सामग्री हरूलाई तोकिएको ठाउँमा व्यवस्थापन गरी दिन र पानीका बोतलहरु जथाभावी नफाली डस्बिनमा राखेर सहयाेग सँगै फोहोर व्यवस्थापनमा सहयोग गरी दिन अनुरोध छ ।
उहाँले नगरलाई स्वच्छ र सुन्दर बनाउने अभियानमा सबै नगरवासीलाई सक्रिय सहभागिताका लागि आग्रह गर्दै यस्ता कार्यक्रम आगामी दिनमा पनि निरन्तर सञ्चालन गरिने जानकारी दिनुभयो।
गोदावरी नगरपालिकाले सरसफाइ, हरियाली प्रवर्द्धन र वातावरण संरक्षणलाई प्राथमिकतामा राख्दै नगरलाई स्वच्छ, सुन्दर र उदाहरणीय शहरका रूपमा विकास गर्ने लक्ष्यसहित अभियानलाई निरन्तरता दिने जनाएको छ।
