तेहरान : इरानका विभिन्न प्रान्तमा अमेरिकी सेनाले गरेको हवाई आक्रमणमा कम्तीमा ३८ जनाको मृत्यु भएको छ भने ४०० भन्दा बढी घाइते भएका छन्। इरानको स्वास्थ्य मन्त्रालयका अनुसार आक्रमणमा पुल, ऊर्जा पूर्वाधार, समुद्री नियन्त्रण टावर तथा अन्य नागरिक संरचनामा ठूलो क्षति पुगेको छ।
प्रेस टिभीका अनुसार होर्मोजगन, बुसेहर, सिस्तान–बलूचिस्तान, खुजेस्तान र लोरेस्तान प्रान्तका विभिन्न स्थानमा बमबारी गरिएको हो। चाबहारस्थित शाहिद कलन्तरी बन्दरगाहको सामुद्रिक नियन्त्रण टावर पूर्ण रूपमा ध्वस्त भएको बताइएको छ। होर्मोजगनमा मात्रै सात जनाको मृत्यु भएको छ भने बन्दर अब्बास, बन्दर खमीर र लार जोड्ने मुख्य सडक तथा पुलहरूमा क्षति पुग्दा यातायात प्रभावित भएको छ। अहवाजस्थित शाहिद बाघाई अस्पताल पनि प्रभावित भएपछि अस्थायी रूपमा खाली गरिएको इरानले जनाएको छ।
अमेरिकी सेन्ट्रल कमान्ड (सेन्टकम) ले भने इरानको इस्लामिक रिभोलुसनरी गार्ड कर्प्स (आईआरजीसी) ले प्रयोग गर्ने तटीय निगरानी प्रणाली, हवाई रक्षा संरचना र सैन्य पूर्वाधारलाई लक्षित गरी कारबाही गरिएको जनाएको छ। तर तेहरानले नागरिक पूर्वाधारलाई जानीजानी निशाना बनाइएको आरोप लगाएको छ।
यसैबीच, इरानले अमेरिकी आक्रमणको कडा प्रतिकार गर्ने चेतावनी दिँदै बहराइन, कुवेत, सिरिया र ओमानस्थित अमेरिकी सैन्य ठेगानामाथि जवाबी आक्रमण सुरु गरेको दाबी गरेको छ। दुवै पक्षबीचको तनाव तीव्र बन्दै जाँदा मध्यपूर्वको सुरक्षा अवस्था थप जटिल बनेको छ।
