हिन्दू धर्मशास्त्रअनुसार आइतबार सूर्यदेवको आराधनाका लागि विशेष महत्व बोकेको दिन मानिन्छ। यस दिन श्रद्धापूर्वक सूर्यदेवको पूजा–आराधना गरेमा समाजमा मान–सम्मान बढ्ने, आत्मविश्वास मजबुत हुने तथा कुण्डलीमा रहेको सूर्यदोष शान्त हुने धार्मिक विश्वास छ।
बिहान सबेरै उठेर स्नान गरी नजिकको मन्दिरमा दर्शन गर्नुपर्छ। त्यसपछि उदाउँदो सूर्यलाई शुद्ध जल अर्पण गर्नु शुभ मानिन्छ। पूजाका क्रममा सूर्यदेवलाई रातो फूल, रातो चन्दन, गुडहलको फूल, अक्षता (चामल) तथा गुड वा गुडबाट बनेका मिठाई चढाउने परम्परा रहेको छ।
पूजा सम्पन्न भएपछि ‘प्रातः स्मरामि…’ वा ‘ॐ खखोल्काय शान्ताय करणत्रयहेतवे’ जस्ता सूर्य मन्त्रमध्ये कुनै एकको श्रद्धापूर्वक जप गर्दा विशेष पुण्य प्राप्त हुने र जीवनमा सकारात्मक ऊर्जा तथा सफलता प्राप्त हुने धार्मिक मान्यता रहेको छ।
