कैलाली: राष्ट्रिय स्वतन्त्र पार्टी (रास्वपा) का प्रतिनिधिसभा सदस्य केपी खनाल र लम्की प्रादेशिक अस्पताल व्यवस्थापन समितिका सदस्य धीरेन्द्र थापाबीच सार्वजनिक कार्यक्रममा भएको भनाभनको भिडियो सामाजिक सञ्जालमा भाइरल भएको छ।
आइतबार लम्की प्रादेशिक अस्पताल सञ्चालनसम्बन्धी विवाद समाधानका लागि आयोजित छलफलमा सदस्य थापाले लम्कीका मेयरलाई पक्राउ गर्न खोजिएको घटनामा सांसद खनालले हस्तक्षेप गरेको भन्ने चर्चाबारे प्रश्न गरेका थिए। त्यसको जवाफ दिने क्रममा सांसद खनाल आक्रोशित हुँदै प्रमाण मागेका र प्रश्नकर्ताप्रति कडा अभिव्यक्ति दिएका थिए, जसको भिडियो अहिले व्यापक रूपमा सामाजिक सञ्जालमा फैलिएको छ।
सदस्य थापाले आफूले अस्पताल सञ्चालनमा देखिएको अन्योलबारे जिज्ञासा मात्र राखेको दाबी गरेका छन्। यता, सांसद खनालका स्वकीय सचिव हेमराज ढकालले भने कार्यक्रमको उद्देश्य अस्पताल सञ्चालनसम्बन्धी विवाद समाधान गर्नु रहेको र सोही क्रममा उठेको प्रश्नका कारण वातावरण तनावपूर्ण बनेको बताएका छन्।
कार्यक्रममा सांसद खनालले प्रदेश सरकार र स्थानीय तहले अस्पताल सञ्चालन गर्न नसके संघीय सरकारले जिम्मेवारी लिनुपर्ने धारणा पनि राखेका थिए। लम्की प्रादेशिक अस्पतालको व्यवस्थापन अधिकारलाई लिएर प्रदेश सरकार र स्थानीय तहबीच लामो समयदेखि विवाद रहँदै आएको छ। पछिल्लो घटनाले अस्पताल व्यवस्थापनसँगै सार्वजनिक पदाधिकारीको अभिव्यक्ति र आचरणबारे पनि बहस चुलिएको छ।
