अमेरिका र इजरायलबाट थप सैन्य कारबाही हुन सक्ने संकेतबीच इरानले कुनै पनि आक्रमणको “निर्णायक र आनुपातिक” जवाफ दिने चेतावनी दिएको छ। इरानी विदेशमन्त्री अब्बास अराघ्चीले टर्की, पाकिस्तान र साउदी अरबका विदेशमन्त्रीसँगको टेलिफोन संवादमा आफ्नो देश युद्धका लागि तयार रहेको सन्देश दिएका छन्। अमेरिकी राष्ट्रपति डोनाल्ड ट्रम्पले इरानमाथि “धेरै कडा” प्रहार गर्ने चेतावनी दिएपछि मध्यपूर्वमा रहेका अमेरिकी दूतावासहरूले आफ्ना नागरिकलाई सतर्क रहन आग्रह गरेका छन्।
यसैबीच विश्व ऊर्जा आपूर्तिको प्रमुख मार्ग मानिने हर्मुज जलडमरूलाई लिएर तनाव थप चुलिएको छ। इरानले अमेरिकी सैन्य गतिविधि नरोकिए हर्मुजमाथिको नाकाबन्दी अझ कडा पार्ने र अन्य रणनीतिक जलमार्गसमेत बन्द गर्न सकिने चेतावनी दिएको छ। युद्धअघि विश्वको करिब २० प्रतिशत कच्चा तेल यही मार्गबाट ढुवानी हुने भएकाले यसको प्रभाव अन्तर्राष्ट्रिय ऊर्जा बजारमा गम्भीर देखिएको छ।
इरानले सम्भावित युद्धलाई ध्यानमा राख्दै आफ्नो सैन्य तयारी तीव्र बनाएको छ। रक्षा उद्योगलाई अन्तरिक्ष प्रविधि, गुप्तचर क्षमता, रक्षा अर्थतन्त्र र औद्योगिक पूर्वाधार सुदृढीकरणमा केन्द्रित हुन निर्देशन दिइएको छ। स्वदेशमै कम लागतमा मिसाइल र ड्रोन उत्पादन विस्तार गर्ने रणनीतिलाई पनि प्राथमिकता दिइएको छ।
उता, अमेरिकाले इरानका ऊर्जा पूर्वाधारमाथि सम्भावित आक्रमणको तयारी गरिरहेको अन्तर्राष्ट्रिय सञ्चारमाध्यमले जनाएका छन्। इरानी सैन्य नेतृत्वले त्यसको कडा प्रतिकार गरिने चेतावनी दिएको छ। विश्लेषकहरूले लामो युद्धका कारण अमेरिकी मिसाइल प्रतिरक्षा प्रणालीमा समेत दबाब बढ्दै गएको बताएका छन्।
हर्मुज र लाल सागरका जलमार्गमा बढ्दो अवरोध, ऊर्जा पूर्वाधारमाथिको सम्भावित आक्रमण र क्षेत्रीय शक्तिहरूको सक्रियतासँगै इरान–अमेरिका तनाव अब केवल दुई देशमा सीमित नरही सम्पूर्ण मध्यपूर्व र विश्व अर्थतन्त्रका लागि गम्भीर चुनौती बन्दै गएको विश्लेषण गरिएको छ।
