कैलालीको धनगढी उपमहानगरपालिका–८ सेतोपुलस्थित सडकमा शनिबार राति भएको मोटरसाइकल दुर्घटनामा एक महिलाको मृत्यु भएको छ भने चालक गम्भीर घाइते भएका छन्।
जिल्ला प्रहरी कार्यालयका अनुसार से ६ प ९७६८ नम्बरको मोटरसाइकल अनियन्त्रित भई दुर्घटना हुँदा पछाडि सवार धनगढी उपमहानगरपालिका–६ निवासी २८ वर्षीया सम्झना चौधरी गम्भीर घाइते भएकी थिइन्। उनको उपचारका क्रममा सेती प्रादेशिक अस्पताल धनगढीमा शनिबार राति मृत्यु भएको प्रहरीले जनाएको छ।
दुर्घटनामा मोटरसाइकल चालक गोदावरी नगरपालिका–८ निवासी ३६ वर्षीय बिनोद चौधरी पनि गम्भीर घाइते भएका छन्। उनको धनगढीस्थित कैलाली अस्पतालमा उपचार भइरहेको छ।
दुर्घटनाको कारण खुल्न नसकेको भन्दै प्रहरीले घटनाबारे थप अनुसन्धान अघि बढाएको जनाएको छ। प्रारम्भिक अनुसन्धानमा मोटरसाइकल अनियन्त्रित भई दुर्घटना भएको देखिएको प्रहरीले जनाएको छ।
