यमनमा फेरि हिंसा चर्किएको छ। मध्य यमनस्थित सरकारी सैन्य शिविरहरूमा हुथी विद्रोहीहरूले बलिस्टिक मिसाइल र ड्रोनमार्फत गरेको भीषण आक्रमणमा सरकारी सेनाका कम्तीमा ३० जना जवान मारिएका छन्। पछिल्ला वर्षहरूमा सरकारी सेना र हुथी विद्रोहीबीच भएको सबैभन्दा घातक आक्रमणमध्ये यो एक मानिएको छ।
यमनको रक्षा मन्त्रालयका अनुसार मारिब र हदरामौत प्रान्तका विभिन्न सैन्य अड्डालाई लक्षित गरी गरिएको आक्रमणमा ठूलो मानवीय क्षति भएको छ। धेरै सैनिक घाइते भएका छन् भने मृतकको यकिन संख्या सार्वजनिक गरिएको छैन। मन्त्रालयले घटनालाई ‘विश्वासघातपूर्ण आक्रमण’को संज्ञा दिँदै उचित समय र स्थानमा कडा जवाफ दिइने चेतावनी दिएको छ।
उता, इरान समर्थित हुथी विद्रोहीहरूले भने आफूहरूले सैन्य अभियानको तयारीमा रहेका ‘ठूला साउदी समर्थित सैन्य जमावडा’लाई निशाना बनाएको दाबी गरेका छन्। यमनको लामो गृहयुद्धमा साउदी अरब नेतृत्वको गठबन्धनले सरकारी सेनालाई निरन्तर समर्थन गर्दै आएको छ।
यसैबीच, साउदी अरबको नज्रान सीमाक्षेत्रमा भएको अर्को आक्रमणमा ११ जना नागरिक घाइते भएका छन्। गठबन्धनका अनुसार घाइतेमध्ये सात जना साउदी नागरिक रहेका छन्, जसमा एक महिला र चार वर्षीय बालक पनि छन्। अन्य घाइते यमन, पाकिस्तान र इजिप्टका नागरिक हुन्। लगातारका आक्रमणले यमन–साउदी सीमाक्षेत्रको सुरक्षा अवस्था थप जटिल बन्दै गएको छ।
