यमनको लाल सागर तटमा माछा मारेर जीविकोपार्जन गर्ने मछुवाको जीवन युद्धका कारण झन् जोखिमपूर्ण बनेको छ। अल–मखा सहरका करिब ४० वर्षीय मछुवा मजहर सन् २०१५ देखि इन्धनको महँगी, डुंगा भाडा र सुरक्षाको चुनौतीबीच काम गर्दै आएका छन्। उनका अनुसार हालै अल–खौखाहमा माछा मार्ने डुंगामाथि गोली चल्दा दुई सहकर्मीको मृत्यु भएको थियो। समुद्रमा गएपछि केही मछुवा बेपत्ता हुने गरेका छन्।
यमनको माछा उद्योग युद्धअघि तेलपछि दोस्रो ठूलो निर्यात आम्दानीको स्रोत थियो। तर द्वन्द्वका कारण सन् २०१८ सम्म यस क्षेत्रबाट हुने माछा निर्यात करिब ७० प्रतिशतले घटेको अध्ययनले देखाएको थियो। लाल सागरको तटीय क्षेत्र रणनीतिक रूपमा समेत महत्वपूर्ण भएकाले यहाँ लामो समयदेखि तनाव कायम छ।
होदेइदाह बन्दरगाह अल–मखाबाट करिब १६० किलोमिटर टाढा छ भने बाब अल–मन्देब जलडमरूमध्य विश्वकै महत्वपूर्ण समुद्री मार्गमध्ये एक हो। हाल हुथी विद्रोहीले साउदी सीमादेखि होदेइदाहसम्मको ठूलो भूभाग नियन्त्रण गर्छन्। गाजामा इजरायलको युद्ध सुरु भएपछि सन् २०२३ अक्टोबरदेखि हुथीहरूले लाल सागरमा व्यावसायिक जहाजमाथि नियमित आक्रमण गर्दै आएका छन्। युद्ध र समुद्री असुरक्षाले स्थानीय मछुवाको आम्दानी, खाद्य सुरक्षा र जीवनमा गम्भीर असर पारेको छ।
