सुदूरपश्चिम प्रदेश सरकारका नवनियुक्त तीन मन्त्री र दुई राज्यमन्त्रीले शुक्रबार राति पद तथा गोपनीयताको शपथ लिएका छन्। नयाँ मन्त्रीहरूको शपथसँगै मुख्यमन्त्री खगराज भट्ट नेतृत्वको प्रदेश सरकारले पूर्णता पाएको छ।
प्रदेश प्रमुख नजिर मियाँले नवनियुक्त मन्त्रीहरूलाई शपथ गराएका थिए भने राज्यमन्त्रीद्वय जानकी कुँवर र इन्दिरा गिरीलाई मुख्यमन्त्री भट्टले पद तथा गोपनीयताको शपथ गराएका हुन्।
मुख्यमन्त्री भट्टले शुक्रबार नेपाली कम्युनिस्ट पार्टीबाट प्रकाश रावल, ओमविक्रम भाट ‘सरल’ र खुसीराम डगौरा थारूलाई मन्त्री तथा जानकी कुँवर र इन्दिरा गिरीलाई राज्यमन्त्री नियुक्त गरेका थिए।
नवनियुक्त प्रकाश रावलले उद्योग, पर्यटन, वन तथा वातावरण मन्त्रालयको जिम्मेवारी पाएका छन्। ओमविक्रम भाट ‘सरल’ भौतिक पूर्वाधार विकासमन्त्री तथा खुसीराम डगौरा थारू आन्तरिक मामिला तथा कानुनमन्त्री बनेका छन्।
त्यस्तै, जानकी कुँवरलाई भौतिक पूर्वाधार विकास राज्यमन्त्री र इन्दिरा गिरीलाई वन राज्यमन्त्रीको जिम्मेवारी दिइएको छ।
यसअघि सत्ता साझेदार नेकपा (एमाले) का तर्फबाट तीन मन्त्री र एक राज्यमन्त्री नियुक्त भइसकेका थिए। पछिल्लो नियुक्तिसँगै प्रदेश सरकारमा मन्त्रालयको जिम्मेवारी बाँडफाँटसमेत टुंगिएको छ।
नवनियुक्त मन्त्री तथा राज्यमन्त्रीले शपथ लिएपछि प्रदेश सरकार सञ्चालनका लागि आवश्यक मन्त्रिपरिषद् संरचना पूर्ण भएको हो। सरकार पूर्ण भएसँगै प्रदेशमा रोकिएका विकास निर्माण, प्रशासनिक काम तथा जनसरोकारका विषयलाई थप गति दिने अपेक्षा गरिएको छ।
