नेपाल राष्ट्र बैंकले विभिन्न पदमा ३४ जनालाई करार सेवामा नियुक्त गर्न अनलाइन दरखास्त आह्वान गरेको छ। बैंकले रक्षक १, सिपाही ४, हलुका सवारी चालक ७, बस चालक ३, डिस्पेन्सरी २ र कार्यालय सहयोगी १७ पदमा आवेदन मागेको हो।
इच्छुक उम्मेदवारले भदौ ९ देखि २३ गतेसम्म राष्ट्र बैंकको वेबसाइटको ‘करियर’ खण्डमा रहेको अनलाइन पोर्टलमार्फत आवेदन दिन सक्नेछन्। दरखास्त दिने अन्तिम दिनसम्म उम्मेदवारको उमेर ४५ वर्ष ननाघेको हुनुपर्नेछ। आवेदन दस्तुर ८ सय रुपैयाँ तोकिएको छ।
रक्षक र सिपाही पदमा नेपाली सेनाबाट अनुभवसहित निवृत्तिभरण प्राप्त गरेका तथा सम्बन्धित शैक्षिक योग्यता पूरा गरेका उम्मेदवार आवश्यक पर्नेछ। चालक पदका लागि कक्षा ८ उत्तीर्ण, कम्तीमा सात वर्षको अनुभव र आवश्यक सवारी चालक अनुमतिपत्र चाहिनेछ। डिस्पेन्सरीका लागि स्टाफ नर्स वा डिप्लोमा फार्मेसी उत्तीर्ण गरी पाँच वर्षको अनुभव आवश्यक छ।
कार्यालय सहयोगीका लागि कक्षा ८ उत्तीर्ण भई सरकारी निकाय, राष्ट्र बैंक वा बैंक तथा वित्तीय संस्थामा काम गरी निवृत्तिभरणसहित अवकाश पाएको हुनुपर्नेछ।
छनोट पदअनुसार लिखित, प्रयोगात्मक परीक्षा र अन्तर्वार्ताबाट हुनेछ। करार अवधि सुरुमा छ महिना रहनेछ। परीक्षा काठमाडौंमा सञ्चालन हुने बैंकले जनाएको छ।
