रसुवाको भोटेकोशीमा एक साताअघि आएको भीषण बाढीपछि बेपत्ता भएका नौ दक्षिण कोरियाली नागरिकको खोजीलाई तीव्र बनाउन दक्षिण कोरियाले ४४ सदस्यीय विपद् राहत टोली नेपाल पठाएको छ। टोली बुधबार बिहान काठमाडौं आइपुगेको हो। दक्षिण कोरियाको परराष्ट्र मन्त्रालयका अनुसार कोरिया विपद् राहत टोली (केडीआरटी) मा परराष्ट्र मन्त्रालय, कोरिया अन्तर्राष्ट्रिय सहयोग एजेन्सी (कोइका) तथा अग्नि नियन्त्रण अधिकारीहरू सहभागी छन्। टोली वायु सेनाको केसी–३३० साइग्नस विमानमार्फत नेपाल आएको हो।
केडीआरटीले नेपाली अधिकारी तथा नेपालमा यसअघि नै परिचालित दक्षिण कोरियाली सरकारी आपत्कालीन प्रतिक्रिया टोलीसँग समन्वय गर्दै खोजी तथा उद्धार अभियान सञ्चालन गर्नेछ। टोलीको प्रारम्भिक तैनाथी करिब १० दिनका लागि तय गरिएको छ। घटनास्थलको अवस्था हेरेर अवधि थप गर्न सकिने जनाइएको छ।
टोलीसँग पाँच वटा उद्धार कुकुरसहित उच्च क्षमताका ड्रोन, भग्नावशेषभित्र रहेका व्यक्तिको आवाज तथा भिडियो पहिचान गर्ने उपकरण र तापीय दृश्य देखाउने प्रविधि छन्। नयाँ टोलीले रसुवाको धुन्चे क्षेत्रमा नेपाली सेनासँग संयुक्त रूपमा हेलिकोप्टर, ड्रोन र जमिनबाट खोजी गर्नेछ।
बाढीपछि माथिल्लो त्रिशूली–१ जलविद्युत आयोजना निर्माणस्थलबाट नौ दक्षिण कोरियाली नागरिक बेपत्ता भएका थिए। उनीहरूमध्ये छ जना डुसान इनरबिलिटी कम्पनी र तीन जना कोरिया साउथ–इस्ट पावर कम्पनीका कर्मचारी हुन्।
यसअघि पनि नेपाली र दक्षिण कोरियाली टोलीले हेलिकोप्टर, ड्रोन तथा उद्धार कुकुर प्रयोग गर्दै खोजी गरिरहेका छन्। तर ठूलो खोजी क्षेत्र, कठिन भूगोल, भग्नावशेष र हिलोका कारण अभियान चुनौतीपूर्ण बनेको छ।
बेपत्ता व्यक्तिको मोबाइल फोनको स्थान पहिचान गर्न सकिने विकल्पबारे समेत नेपाली अधिकारीसँग छलफल भइरहेको छ। डुसान इनरबिलिटी र कोरिया साउथ–इस्ट पावरले पनि आफ्नै स्रोतबाट ड्रोन, हेलिकोप्टर तथा खोजी कुकुर प्रयोग गरी अभियानलाई निरन्तरता दिइरहेका छन्।
