भोटेकोशी नदीमा आएको विनाशकारी बाढीपछि रसुवास्थित चिलिमे जलविद्युत आयोजनाको क्षेत्रमा पुरिएका संरचनाबाट चार जनाको शव फेला परेको छ। नेपाली सेना र सशस्त्र प्रहरीको टोलीले जारी राखेको खोज तथा उद्धार अभियानका क्रममा एक शव फेला परेको हो भने थप तीन शव निकाल्ने क्रम जारी रहेको जनाइएको छ।
बाढीका कारण आयोजना क्षेत्रका विभिन्न संरचना तथा आसपासका स्थानमा ठूलो क्षति पुगेपछि सुरक्षाकर्मीले निरन्तर खोजी गरिरहेका छन्। सशस्त्र प्रहरीका सहायक प्रवक्ता डीएसपी शैलेन्द्र थापाका अनुसार घटनास्थलमा थप मानिस जीवित वा मृत अवस्थामा फेला पर्न सक्ने सम्भावना रहेकाले खोजी कार्यलाई निरन्तरता दिइएको छ।
सुरक्षाकर्मीको टोलीले जोखिमपूर्ण अवस्थामा समेत भग्नावशेष र पुरिएका संरचनामा खोजी गरिरहेको छ। बाढीपछि बेपत्ता भएकाहरूको खोजी तथा उद्धारलाई प्राथमिकता दिँदै थप सम्भावित स्थानमा समेत खोजी विस्तार गरिएको छ।
