यमनका हुथी विद्रोहीहरूले साउदी अरबको राजधानी रियादसहित लाल सागर तटीय क्षेत्रका संवेदनशील तथा ऊर्जा पूर्वाधारलाई लक्षित गरी ड्रोन र मिसाइल आक्रमण गरेको दाबी गरेका छन्। हुथी सैन्य प्रवक्ता याह्या सारीका अनुसार रियाद र प्रमुख तेल केन्द्र यान्बुमा ब्यालिस्टिक तथा क्रुज मिसाइल र ड्रोन प्रयोग गरी आक्रमण गरिएको हो।
साउदी नेतृत्वको गठबन्धनले भने रियादतर्फ प्रहार गरिएको एक ब्यालिस्टिक मिसाइललाई हवाई प्रतिरक्षा प्रणालीले आकाशमै रोकेर नष्ट गरेको जनाएको छ। साथै बैश, ताइफ, फरासान र यान्बुलाई लक्षित गरिएका अन्य आक्रमणसमेत विफल पारिएको साउदी पक्षको दाबी छ।
यसैबीच शनिबार रियादस्थित किङ खालिद अन्तर्राष्ट्रिय विमानस्थलनजिकै इन्धन भण्डारण क्षेत्रबाट ठूलो मात्रामा कालो धुवाँ निस्किएको देखिएको थियो। घटनापछि विमानस्थलको उडान तथा अवतरणमा केही अवरोध भएको जनाइएको छ। तर, साउदी अधिकारीहरूले हालसम्म मानवीय क्षति वा ठूलो भौतिक क्षतिको पुष्टि गरेका छैनन्।
जुलाईदेखि हुथी र साउदी पक्षबीच तनाव बढ्दै आएको अवस्थामा रियादमा पहिलोपटक हवाई आक्रमणको चेतावनी बजाइएको हो। पछिल्लो घटनाले क्षेत्रीय तनाव थप बढाएको छ।
अमेरिकी विदेश मन्त्रालयले पनि मध्यपूर्वमा रहेका आफ्ना नागरिकलाई उच्च सतर्कता अपनाउन तथा सम्भावित उडान रद्द, हवाई क्षेत्र बन्द र यात्रा अवरोधका लागि तयार रहन आग्रह गरेको छ। साउदी अरबका लागि अमेरिकी यात्रा चेतावनी हाल स्तर–३ ‘Reconsider Travel’ मा रहेको छ।
