सुदूरपश्चिम प्रदेशका विभिन्न जिल्लामा मंगलबार राति भूकम्पको धक्का महसुस गरिएको छ। भारतको उत्तराखण्डलाई केन्द्रबिन्दु बनाएर गएको भूकम्पको कम्पन सुदूरपश्चिमका पहाडी तथा आसपासका जिल्लामा समेत महसुस गरिएको हो।
भूकम्प मंगलबार राति १० बजेर ३८ मिनेटमा गएको जनाइएको छ। प्रारम्भिक विवरणअनुसार भारतको उत्तराखण्ड केन्द्रबिन्दु भएर ५.१ म्याग्निच्युडको भूकम्प गएको हो। भूकम्पको केन्द्रबिन्दु दार्चुलाबाट करिब एक सय किलोमिटर पश्चिमतर्फ रहेको बताइएको छ।
भूकम्पको धक्का दार्चुलासहित सुदूरपश्चिमका अन्य जिल्लामा समेत महसुस भएको जनाइएको छ। रातिको समयमा भूकम्पको धक्का महसुस भएपछि केही स्थानका नागरिक घरबाहिर निस्किएका थिए। यद्यपि, हालसम्म भूकम्पबाट मानवीय क्षति वा भौतिक संरचनामा क्षति भएको विवरण सार्वजनिक भएको छैन।
भूकम्पको थप विवरण, केन्द्रबिन्दु र क्षतिको अवस्थाबारे सम्बन्धित निकायबाट जानकारी संकलन भइरहेको छ। पछिल्लो समय सुदूरपश्चिमका विभिन्न क्षेत्रमा भूकम्पका धक्का महसुस हुँदै आएकाले स्थानीयवासीमा त्राससमेत देखिएको छ। सुरक्षा निकाय तथा सम्बन्धित निकायले सम्भावित जोखिमलाई ध्यानमा राख्दै सतर्क रहन आग्रह गरेका छन्।
