नेपाल प्रिमियर लिग (एनपीएल) को तेस्रो संस्करणका लागि सुदूरपश्चिम रोयल्सले वेस्ट इन्डिजका अनुभवी अलराउन्डर फेबियन एलेनलाई टोलीमा अनुबन्ध गरेको छ। आइतबार सामाजिक सञ्जाल फेसबुकमार्फत एलेनलाई टोलीमा स्वागत गर्दै रोयल्सले उनको अनुबन्धबारे जानकारी दिएको हो।
टोलीले क्यारेबियन अलराउन्डर एलेन पहेँलो जर्सीमा आफ्नो ऊर्जा प्रदर्शन गर्न तयार रहेको उल्लेख गर्दै उनलाई स्वागत गरेको छ। एलेनको आगमनसँगै सुदूरपश्चिम रोयल्सको ब्याटिङ र बलिङ दुवै पक्षमा थप विकल्प उपलब्ध हुने अपेक्षा गरिएको छ।
सीमित ओभरको क्रिकेटमा आक्रामक ब्याटिङ र स्पिन बलिङका लागि परिचित एलेनले ब्याट र बल दुवैबाट टोलीका लागि योगदान दिन सक्नेछन्। उनको अलराउन्ड प्रदर्शनले प्रतियोगितामा सुदूरपश्चिमको रणनीतिलाई थप बलियो बनाउन सहयोग पुग्ने विश्वास गरिएको छ।
रोयल्सले यसअघि वेस्ट इन्डिजकै आक्रामक ब्याटर शेरफेन रदरफोर्डलाई पनि टोलीमा अनुबन्ध गरिसकेको छ। विदेशी खेलाडीलाई टोलीमा समावेश गर्दै सुदूरपश्चिमले तेस्रो संस्करणको उपाधि जित्ने लक्ष्यसहित आफ्नो तयारीलाई तीव्र बनाएको छ।
एनपीएलको तेस्रो संस्करण सोमबारदेखि काठमाडौंको कीर्तिपुरस्थित त्रिवि अन्तर्राष्ट्रिय क्रिकेट मैदानमा सुरु हुँदैछ। प्रतियोगिताको उद्घाटन खेलमै सुदूरपश्चिम रोयल्सले साविक विजेता लुम्बिनी लायन्ससँग प्रतिस्पर्धा गर्नेछ। पहिलो खेलबाटै प्रतियोगिताको यात्रा सुरु गर्न लागेको रोयल्सका लागि एलेनसहित विदेशी खेलाडीको प्रदर्शन महत्त्वपूर्ण रहने अपेक्षा गरिएको छ।
