सुर्मा गाउँपालिकामा करदाता शिक्षा तथा अन्तरक्रिया कार्यक्रम सम्पन्न भएको छ । करदातामा करप्रति जनचेतना अभिवृद्धि गर्ने उद्देश्यले गाउँपालिका राजस्व शाखाको आयोजनामा वडा नम्बर १ देखि ५ सम्म उक्त कार्यक्रम गरिएको थियो । करदाता शिक्षा तथा अन्तरक्रिया कार्यक्रम सोमवार सुर्मा गाउँपालिका वडा न २ मा सम्पन्न भएको हो । वडा अध्यक्ष सुरेन्द्र बहादुर बोहराको अध्यक्षतामा उक्त कार्यक्रम गरिएको हो ।
कार्यक्रममा स्थानीय कर प्रणाली, करको महत्त्व, कर तिर्ने प्रक्रिया, सजिलो सेवा प्रवाह लगायतका विषयमा जानकारी प्रदान गरिएको थियो।
कार्यक्रममा विभिन्न वडाबाट सहभागी करदाता, व्यवसायी, समाजसेवी, वडाअध्यक्ष लगायतको उल्लेख्य उपस्थिति रहेको थियो। सहभागीहरूले यस्ता कार्यक्रमले नागरिकमा करप्रति विश्वास र उत्तरदायित्व बोध गराउने भएकाले निरन्तरता दिनुपर्ने सुझाव दिएका छन्।
सुर्मा गाउँपालिका राजस्व शाखा प्रमुख राजेन्द्र प्रसाद अवस्थीका अनुसार, कार्यक्रममा करसम्बन्धी व्यावहारिक ज्ञान प्रदान गर्नुका साथै नागरिक र स्थानीय सरकारबिच उत्तरदायित्वको सम्बन्ध प्रगाढ बनाउने प्रयास गरिएको हो। कार्यक्रमले करदाताहरूमा करप्रतिको बुझाइ, विश्वास र स्वेच्छिक कर तिर्ने प्रवृत्तिमा वृद्धि हुने अपेक्षा गरिएको छ।
