गर्जे, बैतडी: बैतडीको सिगास गाउँपालिकाले आर्थिक वर्ष २०८१/०८२ को वार्षिक समीक्षा तथा चालु आर्थिक वर्ष २०८२/०८३ को पहिलो त्रैमासिक सार्वजनिक सुनुवाइ सम्पन्न गरेको छ । गाउँपालिकाको केन्द्र गर्जेमा आयोजना गरिएको यो कार्यक्रम विकास, सुशासन र ज उत्तरदायित्व प्रतिको गम्भीर प्रतिबद्धता झल्काउने महत्वपूर्ण अवसरका रूपमा सम्पन्न भएको हो ।
सुनुवाइ कार्यक्रममा गाउँपालिका अध्यक्ष हरिसिंह धामी, उपाध्यक्ष धाना धामी, प्रमुख प्रशासकीय अधिकृत रघुनाथ अवस्थी, वडा अध्यक्षहरू, कर्मचारी, स्थानीय नागरिक, सुरक्षाकर्मी, शिक्षक, पत्रकार, अभिभावक तथा विभिन्न सरोकारवालाको उल्लेखनीय सहभागिता रहेको थियो ।
कार्यक्रममा आन्तरिक लेखा परीक्षक टिकासिंह धामीले आर्थिक वर्ष २०८१/०८२ को प्रतिवेदन प्रस्तुत गर्दै सिगास गाउँपालिकाले कुल ५९ करोड ९५ लाख ६६ हजार रुपैयाँ बराबरको बजेट विनियोजन गरी १ सय ९ वटा योजना सफलतापूर्वक सम्पन्न गरेको जानकारी दिए । साथै १४ वटा योजना क्रमागत रूपमा अघि बढिरहेको पनि उनले बताए ।
रोजगार र सामाजिक न्यायका क्षेत्रमा गाउँपालिकाले प्रशंसनीय काम गरेको प्रतिवेदनमा उल्लेख छ । प्रधानमन्त्री रोजगार कार्यक्रममार्फत ८४ जनालाई रोजगारी, ४० जनालाई सीपमूलक तालिम, १५० जना जेष्ठ नागरिकलाई कम्बल वितरण, र ४० जना एकल महिलालाई बाख्रा वितरण गरिएको जानकारी गराइयो।
शिक्षा क्षेत्रमा पनि सिगास गाउँपालिकाले महत्वपूर्ण योगदान दिएको छ । प्रमुख प्रशासकीय अधिकृत रघुनाथ अवस्थीका अनुसार एमबीबीएस अध्ययनका लागि एक जनालाई पूर्ण छात्रवृत्ति, एक जनालाई आंशिक छात्रवृत्ति, र २४ गरीब तथा जेहेन्दार विद्यार्थीलाई छात्रवृत्ति वितरण गरिएको छ।
विपद्को समयमा राहत र उद्धारमा समेत सिगास गाउँपालिका सक्रिय रहेको गाउँपालिका अध्यक्ष हरिसिंह धामीले बताए । उनले भने सिगासको विकास र जनसेवाका लागि हाम्रो नेतृत्व टिम अहोरात्र खटिएको छ । जनताको विश्वास र सहयोगले हामीलाई अझ बल मिलेको छ ।
त्यस्तै, उपाध्यक्ष धाना धामीले न्यायिक समितिमा दर्ता भएका सबै उजुरीहरूको समाधान भइसकेको जनाउँदै, सुशासन र न्यायको पहुँच अब सिगासका प्रत्येक घरमा पुगोस् भन्ने हाम्रो लक्ष्य हो भन्दै जन उत्तरदायित्वमा गाउँपालिकाको प्रतिबद्धता दोहोर्याइन् ।
सार्वजनिक सुनुवाइका क्रममा स्थानीयले राखेका प्रश्नहरूको जवाफ गाउँपालिका अध्यक्ष, उपाध्यक्ष, प्रमुख प्रशासकीय अधिकृत र वडा अध्यक्षहरूले खुलेर दिएका थिए । कार्यक्रमले गाउँपालिकाको काम, उपलब्धि र चुनौतीबारे जनस्तरमा पारदर्शिता बढाउने माध्यमको रूपमा योगदान पुर्याएको सरोकारवालाहरूको मूल्याङ्कन रहेको छ ।
