नेपाल टेलिकमले निकट भविष्यमा आफ्नो ३जी सेवा पूर्ण रूपमा बन्द गरी ४जीमा रूपान्तरण गर्ने तयारी अघि बढाएको छ। कम्पनीले सेवालाई गुणस्तरीय र आधुनिक बनाउन २जी र ३जी सिम प्रयोग गर्ने ग्राहकहरूलाई यथाशीघ्र ४जी सिममा अपग्रेड गर्न सूचित गरेको छ।
ग्राहकहरूलाई म्यासेज र प्रणालीमार्फत जानकारी दिइएको छ। ग्राहकहरूले आफ्नो नजिकको टेलिकम कार्यालयमा गएर नि:शुल्क ४जी सिम लिन सक्नेछन्। सिम परिवर्तनका लागि नागरिकता प्रमाणपत्र, राष्ट्रिय परिचयपत्र, राहदानी वा सवारी चालक अनुमतिपत्र जस्ता सरकारी पहिचानपत्र आवश्यक पर्छ।
पहिले नै ४जी सिम प्रयोग गरिरहेका ग्राहकहरूले *४४४# डायल गरी ४जी तथा भोल्टे सेवा सक्रिय गर्न सक्ने जानकारी टेलिकमले दिएको छ। सेवाको आधुनिकिकरणले मोबाइल सेवा द्रुत र गुणस्तरीय बनाउने विश्वास गरिएको छ।
