सुदूरपश्चिममा STEAM शिक्षाको क्षेत्रमा लोकप्रिय बन्दै गएको छुकछुके रोबोट कार्यशाला को १५औँ संस्करण हाल वाल्मिकी इन्टरनेशनल स्कुल मा उत्साहपूर्वक सञ्चालन भइरहेको छ। भदौ १८ गतेदेखि सुरु भएको चारदिने कार्यशाला भदौ २१ गते भव्य समापनका साथ सम्पन्न हुने कार्यक्रम रहेको छ।
वाल्मिकी इन्टरनेशनल स्कुल सुदूरपश्चिम प्रदेशमा प्राथमिक तहमा International Primary Curriculum (IPC) लागू गर्ने पहिलो विद्यालयको रूपमा परिचित छ। विद्यालयले आधुनिक तथा व्यवहारिक शिक्षालाई प्राथमिकता दिँदै विद्यार्थीहरूलाई विज्ञान, प्रविधि, इन्जिनियरिङ, कला र गणित (STEAM) सँग प्रत्यक्ष रूपमा जोड्ने उद्देश्यले यो कार्यक्रम सञ्चालन गरेको हो।
कार्यशालाको मुख्य उद्देश्य विद्यार्थीहरूलाई सुदूरपश्चिममै विकसित तथा चर्चित छुकछुके रोबोट को हार्डवेयर र सफ्टवेयर प्रणालीसँग परिचित गराउनु हो। कार्यक्रमअन्तर्गत विद्यार्थीहरूले रोबोटको डिजाइन, गियर प्रणाली, मेकानिकल संरचना, इलेक्ट्रोनिक्स, प्रोग्रामिङ तथा एसेम्बली प्रक्रियाको व्यावहारिक ज्ञान हासिल गरिरहेका छन्।
कार्यशालाका प्रशिक्षक GenZ शेखर राम साउद ले विद्यार्थीहरूलाई आधुनिक औद्योगिक उत्पादन प्रक्रिया, समस्या समाधान सीप तथा नवप्रवर्तनात्मक सोच विकास गर्न प्रेरित गरिरहेका छन्। प्रशिक्षणका क्रममा विद्यार्थीहरूले आफ्नै रोबोट निर्माण तथा सञ्चालन गर्दै सिकाइलाई व्यवहारमा उतार्ने अवसर प्राप्त गरेका छन्।
विद्यालयका प्रधानाध्यापक श्री द्रोणाशिष न्यौपाने ले यस्ता कार्यक्रमहरूले विद्यार्थीहरूमा सिर्जनशीलता, नेतृत्व क्षमता र प्राविधिक दक्षता विकास गर्न महत्वपूर्ण भूमिका खेल्ने बताउनुभयो। त्यसैगरी विद्यालय व्यवस्थापन समितिका अध्यक्ष श्री दिनेश राज भण्डारी ले विद्यालयले भविष्य उन्मुख शिक्षा प्रदान गर्ने आफ्नो प्रतिबद्धतालाई निरन्तरता दिएको उल्लेख गर्नुभयो।
कार्यशालाभर विद्यार्थीहरू उत्साहका साथ समूहमा काम गर्दै रोबोट निर्माण, परीक्षण तथा सुधार प्रक्रियामा सहभागी भएका छन्। विद्यालय परिसरमा नवप्रवर्तन, सहकार्य र सिकाइको उत्सवमय वातावरण सिर्जना भएको छ।
कार्यक्रमको विशेष आकर्षणका रूपमा अन्तिम दिन छुकछुके रोबोट फुटबल प्रतियोगिता आयोजना गरिनेछ। प्रतियोगितामा विद्यार्थीहरूले आफैले निर्माण गरेका रोबोटहरूबीच प्रतिस्पर्धा गराउँदै आफ्नो सीप, सिर्जनशीलता र प्राविधिक ज्ञान प्रस्तुत गर्नेछन्। साथै समापन समारोहमा विद्यार्थीहरूको प्रस्तुति, अनुभव आदानप्रदान तथा प्रमाणपत्र वितरण कार्यक्रम समेत आयोजना गरिनेछ।
१५औँ छुकछुके रोबोट कार्यशाला–२०८३ ले सुदूरपश्चिममा STEAM शिक्षा प्रवर्द्धन गर्दै नयाँ पुस्तालाई प्रविधि, नवप्रवर्तन र उद्यमशीलतातर्फ प्रेरित गर्ने महत्वपूर्ण अभियानको रूपमा आफ्नो पहिचान स्थापित गरिरहेको छ।
