अछाममा आँप टिप्ने क्रममा रुखबाट लडेर एक जनाको मृत्यु भएको छ। जिल्लाको साफेबगर नगरपालिका–१ ठेगालगाउँ निवासी ६० वर्षीय नबिन्द्र राज जोशीको ज्यान गएको हो।
प्रहरीका अनुसार आफ्नै घर नजिक रहेको आँपको रुखमा चढेर फल टिप्ने क्रममा उनी अचानक लडेर गम्भीर घाइते भएका थिए। घाइते जोशीलाई तत्काल उपचारका लागि प्रादेशिक अस्पताल बयलपाटा पुर्याइएको थियो।
अस्पतालमा चिकित्सकले परीक्षण गर्दा आइतबार साँझ उनलाई मृत घोषणा गरेका प्रहरीले जनाएको छ। घटनाबारे आवश्यक अनुसन्धान भइरहेको प्रहरीको भनाइ छ।
वर्षायाममा फलफूल टिप्न अग्ला रुखमा चढ्दा विशेष सावधानी अपनाउन स्थानीयवासीलाई आग्रह गरिएको छ।
