देशमा पश्चिमी वायु, स्थानीय वायु तथा अरब सागरबाट भित्रिएको जलवाष्पयुक्त हावाको संयुक्त प्रभावका कारण मौसममा फेरबदल देखिएको छ। मौसम पूर्वानुमान महाशाखाका अनुसार देशका विभिन्न भूभागमा वर्षा, चट्याङ र हिमपातको सम्भावना रहेकाले सतर्कता अपनाउन नागरिकलाई आग्रह गरिएको छ।
हाल पहाडी क्षेत्रहरूमा आंशिकदेखि सामान्य बदली रहेको र केही हिमाली स्थानमा हल्का वर्षा भइरहेको महाशाखाले जनाएको छ। दिउँसो लुम्बिनी र सुदूरपश्चिम प्रदेशसहित पहाडी क्षेत्रका थोरै स्थानहरूमा चट्याङसहित हल्कादेखि मध्यम वर्षा हुनसक्ने पूर्वानुमान गरिएको छ। यस्तै, हिमाली क्षेत्रमा हल्का हिमपातको सम्भावना पनि रहेको छ।
मधेस र लुम्बिनी प्रदेशका केही भागहरूमा हावाहुरीसमेत चल्नसक्ने भएकाले दैनिक जनजीवन, कृषि, स्वास्थ्य, सडक तथा हवाई यातायातमा असर पर्न सक्ने महाशाखाको चेतावनी छ।
आज राति पनि कोशी र गण्डकी प्रदेशका पहाडी तथा हिमाली भूभागमा हल्का वर्षा र हिमपातको सम्भावना कायम रहनेछ।
मौसमको यस्तै अवस्थाका कारण आकस्मिक जोखिम हुन सक्ने भन्दै महाशाखाले जनतालाई सावधानीपूर्वक आर्जन तथा आवागमन गर्न अनुरोध गरेको छ।
