अत्तरियाः अत्तरियामा रहेको महिला बालबालिका तथा सेभ हाउसले जेनजी आन्दोलनका शहिदहरूको सम्झनामा बुधबार दीप प्रज्वलन कार्यक्रम आयोजना गरेको छ। संचालिका जानकी मलासीका अनुसार, कार्यक्रम मार्फत शहिदहरूको बलिदानको सम्मान गर्दै शान्ति र सामाजिक सद्भावको संदेश प्रवाह गरिएको हो।
महिला बालबालिका तथा सेभ हाउस विगत केही वर्षदेखि अनाथ, असहाय, सडक बालबालिका र अन्य विपन्न बालबालिकालाई आवास, शिक्षा र स्वास्थ्य सुविधा उपलब्ध गराउँदै आएको छ। दीप प्रज्वलन कार्यक्रममा बालबालिका, कर्मचारी, शिक्षक र स्थानीयवासी सहभागी भएका थिए।
संचालिकाले भनिन्, “हाम्रो कार्यक्रम मार्फत बालबालिकालाई शहिदहरूको बलिदान र देशप्रति कर्तव्यबोधको महत्व सिकाउने उद्देश्य राखिएको छ। उनीहरूले समाजमा शान्ति र सद्भाव कायम राख्न सघाउने चेतना विकास गर्नेछ।”
दीप प्रज्वलन कार्यक्रममा सहभागी सबैले शहिदहरूको सम्झना गर्दै सामाजिक एकता र भाईचारा कायम रहोस् भन्ने कामना व्यक्त गरेका थिए। कार्यक्रमले सहिद परिवारप्रति सम्मान व्यक्त गर्दै बालबालिकामा जिम्मेवारी र मानवताको महत्व बुझाउने अवसर दिएको छ।
