भदौ २४ गते धनगढीमा भएको प्रदर्शनका क्रममा सुदूरपश्चिम प्रदेश सरकारका विभिन्न मन्त्रालय र कार्यालयमा तोडफोड तथा आगजनी भए पनि लेखा शाखाहरू भने प्रायः सुरक्षित रहेका छन्। मुख्यमन्त्री तथा मन्त्रिपरिषद्को कार्यालय, आर्थिक मामिला, भौतिक पूर्वाधार, भूमि व्यवस्था, कृषि तथा सहकारी, सामाजिक विकास, आन्तरिक मामिला तथा कानुन र उद्योग, पर्यटन, वन तथा वातावरण मन्त्रालयका लेखा शाखामा सामान्य क्षति मात्र भएको हो।
मुख्यमन्त्री तथा मन्त्रिपरिषद्को कार्यालयका लेखा अधिकृत भोजराज जोशीका अनुसार कम्प्युटरमा क्षति भए पनि लेखा शाखाका स्रेस्ता सुरक्षित छन्। ती शाखाहरू तेस्रो तलामा रहेकोले आगो पुग्न सकेन। सामाजिक विकास मन्त्रालयमा भुइँतलामा आगजनी भए पनि कागजात जोगिएको बताइएको छ।
यस्तै, आन्तरिक मामिला तथा कानुन मन्त्रालयका कर्मचारीले लेखासम्बन्धी कागजात सुरक्षित राख्न सफल भएका थिए। उद्योग, पर्यटन, वन तथा वातावरण मन्त्रालयमा बाहिरबाट सामान्य तोडफोड भए पनि आगजनी नभएकाले नोक्सानी कम भएको छ। भूमि व्यवस्था, कृषि तथा सहकारी मन्त्रालयमा कम्प्युटर र दराज तोडफोड भए पनि स्रेस्ता सुरक्षित रहेको वरिष्ठ कृषि प्रसार अधिकृत हरिप्रसाद पनेरुले जनाएका छन्।
कुल मिलाएर, तोडफोड र आगजनी व्यापक भए पनि लेखा शाखाका मुख्य कागजात सुरक्षित रहनु महत्वपूर्ण उपलब्धि मानिएको छ।
