दसैँ सुरु भएसँगै कञ्चनपुरका थारू बस्तीमा उत्साह र चहलपहल बढेको छ। बेदकोट नगरपालिका–९ लालपुरमा समुदायका सदस्यहरू साँझ ८ बजे बडघरको आँगनमा जम्मा भएर सखिया नाच्ने परम्परा चलाउँदै आएका छन्। सखिया नाचमा महाभारतको कथामा आधारित गीत गाइन्छ र प्रत्येक घरका पुरुष तथा महिला सहभागी हुनु अनिवार्य छ।
स्थानीय सीता चौधरीका अनुसार, सुरुवातमा देवी–देवताको नाम लिएर नाच सुरु हुन्छ। सखिया नाचले थारू समुदायको पहिचान, मौलिकता र आपसी भाइचाराको भावना बलियो बनाउँछ। यद्यपि, आधुनिक जीवनशैलीका कारण पहिले एक महिना नाच्ने चलन घटेर दस दिनमै सीमित भएको छ।
सखिया नाचमा युवतीले सेतो फरिया र रातो चोलिया लगाउँछन् भने पुरुषले सेतो धोती र कमिज लगाउँछन्। मादलको तालमा गीत नसकिएसम्म नाच रोकिँदैन। गीतको भाका लामो भएकाले केही गाउँमा तिहारसम्म नाचिने प्रचलन छ। यस परम्पराले आगामी पिँढीमा संस्कृतिप्रतिको लगाव बढाउने र समुदायमा एकता कायम राख्ने विश्वास गरिएको छ।
