दार्चुला जिल्लाको उत्तरी क्षेत्र तिङ्कर र छाङ्रुका मतदाताका लागि सदरमुकाम खलङ्गा नजिकैको टिङ्करखेडामा मतदान गर्न सकिने व्यवस्था हुने भएको छ। जाडोयाममा परिवारसहित बेँसीमा बस्ने बासिन्दाका लागि उनीहरू बसेकै ठाउँमा मतदानस्थल स्थापना गर्न लागिएको निर्वाचन कार्यालयका प्रमुख प्रदीप धामीले जानकारी दिए।
धामीका अनुसार, तिङ्कर गाउँका मतदाताका लागि मौतिमैला सङ्घ आधारभूत विद्यालय र छाङ्रु गाउँका मतदाताका लागि कैलाशपति आधारभूत प्राथमिक विद्यालयमा दुई मतदानस्थलको व्यवस्था गरिएको छ। छाङ्रु गाउँमा ३७५ र तिङ्कर गाउँमा २४४ मतदाता छन्।
निर्वाचन आयोगको सहमतिमा प्रतिकूल मौसमका अवस्थामा पनि मतदाताले आफ्नै क्षेत्रमा मतदान गर्न पाउनेछन्। दार्चुलामा ब्यास गाउँपालिका–१ मा आदिवासी सौका समुदायको बसोबास छ। जिल्लामा ९२,९४८ मतदाता छन् र मतदानका लागि ११२ मतदानस्थल र १४३ मतदान केन्द्र स्थापना गर्न लागिएको छ।
आगामी फागुन २१ गते हुने प्रतिनिधिसभा निर्वाचनमा ११ जना उम्मेदवारबीच चुनावी प्रतिस्पर्धा हुने अपेक्षा गरिएको छ।
