धनगढीमा स्वास्थ्य क्षेत्रमा नयाँ पहिचान थप्दै १०० शय्याको अत्याधुनिक केयरटेकर हस्पिटल औपचारिक रूपमा सञ्चालनमा आएको छ। यस अस्पतालले सुलभ मूल्यमा गुणस्तरीय स्वास्थ्य सेवा प्रदान गर्दै निजी अस्पताल जत्तिकै सुविधा र प्रविधि उपलब्ध गराउने लक्ष्य राखेको छ।
अस्पतालका अध्यक्ष गोपालबहादुर शाहीका अनुसार उपचार खर्च सरकारी अस्पताल सरह राख्दै सेवा, व्यवस्थापन र प्रविधि निजीस्तरको बनाउने उद्देश्य लिइएको हो। यहाँ २४ सै घण्टा इमरजेन्सी सेवा, मोडुलर अपरेसन थिएटर, जनरल मेडिसिन, हाडजोर्नी, मुटुरोग, न्यूरोलोजी, डेन्टल केयर, फिजियोथेरापी, ल्याब, एक्स–रे र अल्ट्रासाउन्ड सेवा उपलब्ध छन्।
निकट भविष्यमा सिटी स्क्यान, आइभिएफ, मुटु तथा क्यान्सर विभाग सञ्चालन गर्ने योजना समेत अघि सारिएको छ। २४ घण्टा एम्बुलेन्स सेवा, पर्याप्त पार्किङ, हरियाली वातावरण र आरामदायी पूर्वाधारले बिरामीमैत्री वातावरण सुनिश्चित गरेको छ।
सामाजिक उत्तरदायित्वमा प्रतिबद्ध हस्पिटलले ग्रामीण क्षेत्रमा निःशुल्क स्वास्थ्य शिविर सञ्चालन गर्ने, कमजोर वर्गका बिरामीलाई सहुलियत दिने र स्वास्थ्य शिक्षामा पनि योगदान गर्ने जनाएको छ। स्थानीयवासीले अब धनगढीमै भरोसायोग्य र आधुनिक स्वास्थ्य सेवा पाउने विश्वास गरिएको छ।
