काठमाडौं: इन्डियन आयल कर्पोरेसन (आईओसी)ले पेट्रोलियम पदार्थको नयाँ मूल्यसूचीमा दोहोरो अंकले मूल्य वृद्धि गरेर पठाए पनि नेपाल आयल निगमले हालसम्म उपभोक्ताका लागि नयाँ मूल्य सार्वजनिक गरेको छैन। निगमका अनुसार स्वचालित मूल्य प्रणालीअनुसार प्रतिलिटर २ रुपैयाँभन्दा बढी मूल्य समायोजन गर्नुपर्ने अवस्थामा सञ्चालक समितिको निर्णय अनिवार्य हुने कानुनी व्यवस्था छ।
सार्वजनिक बिदाका कारण सञ्चालक समितिको बैठक बस्न नसकेकाले नयाँ मूल्य निर्धारणमा ढिलाइ भएको निगमले जनाएको छ। आपूर्ति सचिव नारायणप्रसाद शर्मा दुवाडीको अध्यक्षतामा बस्ने सञ्चालक समितिले निर्णय गरेपछि मात्र संशोधित मूल्यसूची लागू हुनेछ।
अन्तर्राष्ट्रिय बजारमा कच्चा तेलको मूल्य निरन्तर बढिरहेका कारण नेपालमा पनि पेट्रोल, डिजेल र मट्टितेललगायत पेट्रोलियम पदार्थको मूल्य वृद्धि हुने लगभग निश्चित भएको छ। अब निगमको सञ्चालक समितिको निर्णयपछि नयाँ मूल्यसूची सार्वजनिक हुने र त्यसअनुसार उपभोक्ताले बढेको मूल्य तिर्नुपर्ने अवस्था आउने देखिएको छ।
