नेपाली बजारमा सुनचाँदीको मूल्य लगातार दोस्रो दिन घटेको छ। नेपाल सुनचाँदी व्यवसायी महासंघका अनुसार मंगलबार (भदौ ३०) छापावाल सुनको मूल्य प्रतितोला ९०० रुपैयाँले घटेको हो।
मंगलबार छापावाल सुन प्रतितोला ३ लाख १०० रुपैयाँमा कारोबार भइरहेको छ। सोमबार सुनको मूल्य १ हजार २०० रुपैयाँले घटेर ३ लाख १ हजार रुपैयाँमा कारोबार भएको थियो। त्यसअघि आइतबार भने सुनको मूल्य १ हजार २०० रुपैयाँले बढेर प्रतितोला ३ लाख २ हजार २०० रुपैयाँ पुगेको थियो।
त्यस्तै, मंगलबार चाँदीको मूल्य पनि घटेको छ। चाँदी प्रतितोला २० रुपैयाँले घटेर ४ हजार ६०० रुपैयाँमा कायम भएको महासंघले जनाएको छ।
सोमबार चाँदीको मूल्य ४० रुपैयाँले घटेर ४ हजार ६२० रुपैयाँमा कारोबार भएको थियो भने आइतबार ६० रुपैयाँले बढेर ४ हजार ६६० रुपैयाँ पुगेको थियो।
