अत्तरिया — कैलालीको अत्तरियामा जैगडी एकता समाजको पहिलो राष्ट्रिय भेला आयोजना गरिएको छ। शनिबार सुदूरपश्चिम, कर्णाली र लुम्बिनी प्रदेशमा बसोबास गर्ने जैगडी समुदायका परिवारहरूको सहभागितामा भेला आयोजना गरिएको हो।
भेला आयोजनाका संयोजक मनोज जैगडीले समुदायको इतिहास, विरासत र पहिचान संरक्षण गर्ने उद्देश्यले कार्यक्रम आयोजना गरिएको बताए। उनले जैगढ ऐतिहासिक महत्त्व बोकेको स्थान भएको उल्लेख गर्दै समुदायको आफ्नो छुट्टै इतिहास र अस्तित्व रहेको बताए।
उनका अनुसार समुदायका कुलदेवता दूध्या मष्टो हुन्। जैगडी परिवारको इतिहास, भाषा र सांस्कृतिक पहिचानको अध्ययन तथा संरक्षण गर्ने योजना पनि समाजले अघि सारेको छ।
पछिल्लो समय जैगडी समुदायका कतिपय व्यक्तिले लुहार, विकलगायत अन्य थर लेख्ने गरेकाले मौलिक पहिचान गुम्ने जोखिम बढेको समुदायका अगुवाहरूको भनाइ छ। सुदूरपश्चिममा मात्रै यस समुदायको जनसङ्ख्या ५ देखि ९ प्रतिशतसम्म हुन सक्ने अनुमान गरिएको छ।
अत्तरियामा आयोजित भेलाबाट पहिलो पटक जैगडी एकता समाजको कार्यसमिति चयन गरिने जनाइएको छ।
