जेन जी आन्दोलनको प्रभाव नेपालका शैक्षिक संस्था र सामाजिक संरचनामा देखिएको छ। सुदूरपश्चिम विश्वविद्यालय, दार्चुला बहुमुखी क्याम्पसका स्वतन्त्र विद्यार्थी युनियन, प्राध्यापक संघ, कर्मचारी संघ र अन्य राजनीतिक दल निकटका समूहले क्याम्पसमा निरन्तर राजनीतिक हस्तक्षेप गर्दै निष्पक्षता र स्वतन्त्रता भंग गरिरहेको आरोप लगाएका छन्।
यसै कारण, विद्यार्थीहरूले क्याम्पस प्रशासनलाई संघ-संगठन खारेज गर्ने निवेदन दिएका थिए, तर कुनै प्रतिक्रिया प्राप्त नभएको बताइएको छ। त्यसैले स्वतन्त्र र विवेकी विद्यार्थीहरूले आफ्ना माग पूरा नभएसम्म क्याम्पसमा तालाबन्दी गर्ने निर्णय गरेका छन्। उनीहरूको घोषणाले क्याम्पसमा शिक्षा प्रणालीमा हस्तक्षेप विरुद्धको चेतना र राजनीतिक स्वच्छता कायम राख्ने उद्देश्य प्रष्ट भएको छ।
विद्यार्थीहरूले शैक्षिक स्वतन्त्रता, निष्पक्ष प्रशासन र भ्रष्टाचारमुक्त वातावरण सुनिश्चित गर्न यो कदम चालिएको बताएका छन्। क्याम्पसमा विद्यार्थी आन्दोलनले भविष्यमा शिक्षाको गुणस्तर र प्रशासनिक पारदर्शितामा प्रभाव पार्ने अपेक्षा गरिएको छ।
