धनगढीः जिल्ला प्रशासन कार्यालय कैलालीले भदौ २३ र २४ गतेको जेनजी आन्दोलनका क्रममा घाइते भएकाहरुलाई परिचयपत्र र भैपरी खर्च वितरणका लागि निवेदन माग गरेको छ। सरकारी तथ्याङ्क अनुसार सो आन्दोलनमा कैलालीका ५४ जना घाइते भएका थिए।
प्रशासनका सूचना अधिकारी शिवराज जोशीका अनुसार योग्य घाइतेहरूलाई आवश्यक कागजात र प्रमाणको आधारमा परिचयपत्र प्रदान गरिने र प्रतिघाइते २० हजार रुपैयाँसम्म खर्च सहायता उपलब्ध गराइनेछ।
निवेदन दिने व्यक्तिले सम्बन्धित स्थानीय तहको सिफारिससहित अस्पताल भर्ना टिकट, घाइतेको बैंक खाता नम्बर, दुई प्रति हालसालै खिचिएको फोटो, र नागरिकता वा राष्ट्रिय परिचयपत्र लिएर कार्यालयमा उपस्थित हुनुपर्ने जनाइएको छ। प्रशासनले घाइतेहरूको सहजीकरणका लागि प्रक्रिया सरल बनाएको र समयमै सहयोग पाउने व्यवस्था मिलाएको जनाएको छ।
