बर्दिया:स्थानीय समुदायसँगको सहकार्य, शिक्षामैत्री अभियान र सामाजिक जिम्मेवारीलाई प्राथमिकता दिंदै छिमेक लघुवित्त वित्तीय संस्था लिमिटेड, शाखा कार्यालय मैना पोखरले बासगढी नगरपालिका ०६, दाङ्गपुर स्थित जनसेवी प्राथमिक विद्यालयमा शैक्षिक सामग्री वितरण गरेको छ।
विद्यालय प्राङ्गणमै आयोजित कार्यक्रमका बीच यस विद्यालयमा अध्ययनरत विद्यार्थीहरूलाई कापी, कलम र विद्यालय झोलासहितका आवश्यक शैक्षिक सामग्री हस्तान्तरण गरिएको हो।
शिक्षामा पहुँच र उपयोगितामा बसेको असमानता घटाउने उद्देश्यले गरिएको यस वितरण कार्यक्रमलाई विद्यालय समुदायले अत्यन्तै उपयोगी र प्रोत्साहनदायी रहेको बताएको छ। शिक्षकहरूले विशेषगरी आर्थिक अभावका कारण नियमित सामग्री जुटाउन मुस्किल परिरहेका विद्यार्थीहरूलाई यसले ठूलो राहत मिलेको धारणा राखेका छन्।
कार्यक्रमका प्रमुख अतिथि तथा छिमेक लघुवित्त वित्तीय संस्था लिमिटेडका लुम्बिनी प्रदेश प्रबन्धक रामनाथ महतोले संस्थाले आर्थिक सेवा मात्र प्रदान नगरी सामाजिक उत्तरदायित्वअन्तर्गत शिक्षा, स्वास्थ्य र सीप विकासजस्ता क्षेत्रमा पनि निरन्तर सहयोग गर्दै आएको उल्लेख गरे।
उनका अनुसार
“गाउँ–गाउँमा वित्तीय पहुँच वृद्धिसँगै शिक्षा जस्ता आधारभूत क्षेत्रमा लगानी गर्नु समुदायको सुदृढ भविष्य निर्माणसँग प्रत्यक्ष सम्बन्धित छ,”
भन्ने संस्थागत मान्यता अनुरूप यस्ता कार्यक्रमलाई आगामी दिनमा अझ विस्तार गरिनेछ।
अनुगमन प्रमुख सुरेश अर्यालले शिक्षामा लगानी कुनै पनि समुदायको दिगो विकासका लागि पहिलो पूर्वाधार हुने उल्लेख गर्दै छिमेक लघुवित्तले सञ्चालन गरिरहेका सामाजिक कार्यक्रमहरूलाई व्यवस्थितरूपमा अगाडि बढाउने प्रतिबद्धता व्यक्त गरे।
कार्यक्रममा शाखा प्रबन्धक कृष्ण थापा, बसन्त घिमिरे लगायत लघुवित्तका अन्य कर्मचारीहरू उपस्थित थिए। विद्यालयका शिक्षक तथा अभिभावकहरू समेत संयोजित सहभागिता सहित कार्यक्रम सम्पन्न भएको विद्यालयले जनाएको छ।
विद्यालय व्यवस्थापन समितिका प्रतिनिधिहरूले छिमेक लघुवित्त प्रति कृतज्ञता व्यक्त गर्दै ग्रामीण भेगमा अध्यनरत बालबालिकाको उज्ज्वल भविष्य सुनिश्चित गर्न यस्ता कार्यक्रमले महत्त्वपूर्ण योगदान पुर्याउने बताएका छन्। साथै, भविष्यमा विद्यार्थीहरूको सीप अभिवृद्धि तथा पूर्वाधार विकासमा पनि सहकार्य गर्नुपर्ने अपेक्षा व्यक्त गरिएको छ।
शैक्षिक क्षेत्रलाई केन्द्रमा राखेर गरिएका यस्ता सहयोग कार्यक्रमले ग्रामीण विद्यालयहरूमा पठन–पाठनको गुणस्तर, विद्यार्थीको नियमितता र अध्ययनप्रतिको उत्साह बढाउने गरेका छन्। छिमेक लघुवित्तले सामाजिक उत्तरदायित्व अन्तर्गत विभिन्न जिल्लामा शिक्षासम्बन्धी कार्यक्रम, स्वास्थ्यमूलक पहल र दिगो आजीविकामुखी परियोजना सञ्चालन गर्दै आएको छ।
