सुदूरपश्चिमको बैतडी जिल्लामा आज बिहानैदेखि मतदान कार्य सुरु भएको छ। जिल्लाभर स्थापना गरिएका सबै मतदान केन्द्रहरूमा मतदाताको उल्लेखनीय उपस्थिति देखिएको छ। निर्वाचन आयोगले तोकेको कार्यतालिका अनुसार बिहान ७ बजेदेखि नै मतदान प्रक्रिया औपचारिक रूपमा अघि बढाइएको हो।
बिहान सबेरैदेखि नै कतिपय केन्द्रहरूमा मतदाताको लाम देखिन थालेको थियो। विशेषगरी पहिलो पटक मतदान गर्न आएका युवायुवतीमा उत्साह झनै बढी देखिएको छ। उनीहरू लोकतान्त्रिक प्रक्रियामा सहभागी हुन पाउँदा गर्व लागेको प्रतिक्रिया दिएका छन्। स्थानीय बासिन्दाहरूले पनि शान्तिपूर्ण रूपमा मतदान सम्पन्न होस् भन्ने अपेक्षा व्यक्त गरेका छन्।
जिल्ला प्रशासन कार्यालयका अनुसार मतदान केन्द्रहरूमा सुरक्षा व्यवस्था कडा पारिएको छ। नेपाल प्रहरी, सशस्त्र प्रहरी,नेपाल आर्मी र म्यादी प्रहरी परिचालन गरिएका छन्। संवेदनशील र अति संवेदनशील केन्द्रहरूमा थप निगरानी व्यवस्था मिलाइएको प्रशासनले जनाएको छ। हालसम्म कुनै अप्रिय घटना नघटेको र मतदान शान्तिपूर्ण वातावरणमा भइरहेको जनाइएको छ।
ज्येष्ठ नागरिक, महिला तथा अपांगता भएका व्यक्तिहरूका लागि विशेष प्राथमिकता दिइएको छ। उनीहरूलाई सहज रूपमा मतदान गर्न सक्ने गरी अलग लाइन तथा सहयोगी स्वयंसेवकको व्यवस्था गरिएको छ। कतिपय केन्द्रहरूमा स्वास्थ्यकर्मीसमेत खटाइएको छ।
यसैबीच, जिल्लाको सिगास गाउँपालिका ०२ गाजरीस्थित ‘ख’ मतदान केन्द्रमा ६२ वर्षीय अपांग मतदाता मनबिर सिंह धामीले पहिलो मत खसाल्दै मतदान प्रक्रिया सुरु गरेका थिए। त्यस्तै ‘क’ मतदान केन्द्रमा कृष्ण सिंह ढाटले पहिलो मत खसालेका थिए। ‘क’ केन्द्रमा निर्वाचन अधिकृतका रूपमा ओमराज उपाध्याय र ‘ख’ केन्द्रमा राजेन्द्र प्रसाद भट्ट खटिएका छन्।
निर्वाचन अधिकृतहरूले निर्धारित समयसम्म सबै मतदातालाई सहज रूपमा मतदान गर्ने वातावरण मिलाइने बताएका छन्। साँझसम्म मतदान सम्पन्न भएपछि मतपेटिकाहरूलाई कडा सुरक्षाबीच सुरक्षित स्थानमा राखिने कार्यक्रम रहेको छ। त्यसपछि मतगणनाको प्रक्रिया अघि बढाइनेछ।
स्थानीय तहदेखि संघीय तहसम्मको लोकतान्त्रिक अभ्यासलाई सुदृढ बनाउने महत्वपूर्ण अवसरका रूपमा हेरिएको यस निर्वाचनमा बैतडीवासीको सक्रिय सहभागिताले लोकतन्त्रप्रतिको विश्वास र प्रतिबद्धता झल्काएको छ। जिल्लाभर उत्साह, अनुशासन र शान्तिपूर्ण वातावरणमा मतदान कार्य जारी रहेको छ।
