हाल नेपालमा पश्चिमी वायु, उपल्लो वायुमण्डलमा रहेको उच्च चापीय प्रणाली तथा पूर्वी भूभाग नजिकको न्यून चापीय क्षेत्रको आंशिक प्रभाव रहेको मौसम पूर्वानुमान महाशाखाले जनाएको छ। यसको प्रभावले देशका पहाडी र हिमाली क्षेत्रमा सामान्य बदली देखिएको छ भने तराई तथा उपत्यकाका केही स्थानमा तुवाँलो लागेको छ।
आज दिउँसो कोशी, मधेस, बागमती र गण्डकी प्रदेशसहित अधिकांश पहाडी भूभागमा बदली रहने सम्भावना छ। कोशी, बागमती, गण्डकी र लुम्बिनी प्रदेशका पहाडी तथा हिमाली क्षेत्रमा केही स्थानमा चट्याङसहित हल्का वर्षा र हिमपात हुन सक्ने अनुमान गरिएको छ। कर्णाली र सुदूरपश्चिमका पहाडी क्षेत्रमा पनि वर्षाको सम्भावना रहेको छ।
आज राति पनि कोशी, मधेस, बागमती, गण्डकी र लुम्बिनी प्रदेशका पहाडी भूभागमा सामान्य बदली रहनेछ भने अन्य स्थानमा आंशिक बदली रहने अनुमान छ। केही स्थानमा चट्याङसहित हल्का वर्षा र हिमपात हुन सक्ने मौसमविद्ले बताएका छन्।
