🌏ओमानसँगै नेपाल पुनः विश्वकपमा ! भारत–श्रीलंकामा हुने टी–२० विश्वकपमा स्थान पक्का 🇳🇵🏏

सुदूरखबर संवाददाता २०८२ आश्विन २९, बुधबार १७:०१

मिनेट387जना

भारत र श्रीलंकामा सन् २०२६ मा हुने टी–२० विश्वकपका लागि नेपाल र ओमानले आफ्नो स्थान सुनिश्चित गरेका छन्। ओमानमा जारी एसिया क्षेत्रको छनोट प्रतियोगितामा शीर्ष दुईमा पुग्दै दुवै टोलीले विश्वकप यात्रा पक्का गरेका हुन्।

नेपालका लागि यो लगातार दोस्रो र समग्रमा तेस्रो विश्वकप हो। नेपालले सन् २०१४ मा बंगलादेशमा पहिलोपटक सहभागिता जनाएको थियो भने सन् २०२४ मा अमेरिका–वेस्टइन्डिजमा पुनः खेलेको थियो।

सुपर सिक्स चरणमा नेपालले लगातार दुई खेल जित्दै कुल ६ अंकसहित शीर्ष स्थान सुरक्षित गरेको छ। अब बाँकी खेलहरूको समीकरणले केवल तेस्रो टिमको टुंगो तय गर्नेछ। बुधबार कतारले जापानलाई हराएपछि नेपाल र ओमान विश्वकप प्रवेशमा आधिकारिक रूपमा पक्का भएका हुन्।

अब नेपालले बुधबार ओमान र शुक्रबार सामाओसँग भिड्नेछ। यी खेलहरू उपाधि निर्धारणका लागि निर्णायक हुने अपेक्षा गरिएको छ।