नेपाली बजारमा शुक्रबार सुनको मूल्यमा ठूलो गिरावट आएको छ । नेपाल सुनचाँदी व्यवसायी महासंघका अनुसार शुक्रबार छापावाल सुन तोलामा ४ हजार २०० रुपैयाँले घटेर २ लाख ३५ हजार रुपैयाँमा झरेको हो । बिहीबार सोही सुनको मूल्य तोलामा २ लाख ३९ हजार २०० रुपैयाँ कायम थियो ।
उता, चाँदीको मूल्य भने निरन्तर वृद्धि हुँदै आएको छ । बिहीबार तोलामा ३ हजार २५ रुपैयाँमा रहेको चाँदी शुक्रबार बढेर ३ हजार ८५ रुपैयाँमा पुगेको महासंघले जनाएको छ । यो मूल्य हालसम्मकै उच्च हो ।
सुनको मूल्यमा आएको गिरावटले वैवाहिक सिजन नजिकिँदै गर्दा खरिदकर्तालाई राहत मिल्ने देखिएको छ । यद्यपि चाँदीको मूल्य वृद्धिले बजारमा नयाँ चुनौती थपेको व्यवसायीहरूको भनाइ छ ।
