तिहार सकिएसँगै दार्चुलाका विभिन्न क्षेत्रमा जात्राको रौनक सुरु भएको छ। भाइटिकादेखि सुरु हुने यो जात्रा पूर्णिमासम्म चल्ने परम्परा रहेको छ। शैल्यशिखर, महाकाली नगरपालिका, मालिकार्जुन र लेकम गाउँपालिकामा करिब एक महिनासम्म रात्रिकालीन जात्रा लाग्ने गर्छ।
शैल्यशिखर नगरपालिकास्थित लटिनाथ मन्दिर बन्तोली र मालिकार्जुन गाउँपालिकाको लटिनाथ कैयलपाल मन्दिर चौडमा आजदेखि जात्रा सुरु भएको हो। शैल्यशिखरको जात्रा त्रयोदशीका दिन र मालिकार्जुन जात्रा चतुर्दशीमा सम्पन्न हुनेछ। लेकाली क्षेत्रका स्थानीयका लागि दशैँ–तिहारभन्दा जात्राको सांस्कृतिक महत्त्व अझ गहिरो मानिन्छ।
भाइटिका लगाइसकेपछि शैल्यशिखर–७ लटिनाथ मन्दिर बन्तोली र मालिकार्जुन–३ लटिनाथ मन्दिर चौडमा धार्मिक तथा सांस्कृतिक कार्यक्रम सुरु हुने गर्दछ। स्थानीयले जात्राको तयारी एक महिना अघिदेखि नै गर्ने गरेको बताइन्छ। लेकम–५ मैखोली खर्क र मालिकार्जुन–३ चौडमा सरसफाइ पूरा गरिएको स्थानीय राधावल्लभ जोशीले जानकारी दिए।
जात्रा अवधिभर मदिरा सेवन, जुवातास र अवाञ्छित गतिविधि निषेध गरिएको संयोजक मनिराज जोशीले बताए। जात्रामा भक्तजनले पूजाआजा, दमाहा बाजा, र डेउडा खेलका माध्यमबाट सांस्कृतिक उत्सव मनाउने गर्छन्। जिल्ला प्रशासन कार्यालयले जात्रा शान्तिपूर्ण बनाउन सुरक्षाकर्मी परिचालन गरेको प्रमुख जिल्ला अधिकारी अनिल पौडेलले जनाएका छन्।
