डडेल्धुराः सुदूरपश्चिम प्रदेशका मुख्यमन्त्री कमल बहादुर शाहले नेपाली कांग्रेसभित्र अब वैचारिक बहस सुरु गर्ने बेला आएको बताउनुभएको छ।
सोमबार डडेल्धुरामा आयोजित पार्टी कार्यकर्ता भेटघाट कार्यक्रममा उहाँले पार्टीलाई चलायमान र सुदृढ बनाउन महासमिती सदस्यहरूबीच वैचारिक बहस र छलफल आवश्यक रहेको बताउनुभयो। उहाँले अहिलेको विषम परिस्थितिमा विशेष महाधिवेशनको बखेडा उठाउनेभन्दा आन्तरिक संवाद र समन्वयमार्फत समाधान खोज्नुपर्नेमा जोड दिनुभयो।
मुख्यमन्त्री शाहले भन्नुभयो, “सीमित व्यक्तिहरू नेतृत्व कब्जा गर्न विशेष महाधिवेशनको पक्षमा छन्, तर यसले पार्टीलाई दीर्घकालीन रूपमा फाइदा पुर्याउँदैन।”
उहाँले नेपाली कांग्रेसका सभापति शेरबहादुर देउवा र आरजु देउवा राणालाई लक्षित गर्दै गरिएको विरोधबारे पनि टिप्पणी गर्नुभयो। शाहले भन्नुभयो, “देउवा र राणालाई सिध्याउँछु भन्नु दिवा सपना हो। पञ्चहरूले पञ्चायतकालमा सिध्याउन सकेनन्, माओवादीले गोली प्रहार गरेर पनि सकेनन्, र जेन्जि आन्दोलनका क्रममा उहाँ माथी सांघातिक आक्रमणभयो त्यसबाट पनि उहाँ कतै विचलित हुनु भएन। ”
सोही दिन मुख्यमन्त्री शाहले बैतडीको पाटन नगरपालिकामा जनप्रतिनिधि तथा कर्मचारीहरूसँग भेटघाट गर्नुभयो। भेटमा पाटन नगरपालिकाको विकास, करार कर्मचारी व्यवस्था, र स्थानीय सेवा सञ्चालन ऐनका विषयमा विस्तृत छलफल भएको थियो।
त्यसपछि उहाँले पाटन नगरपालिका–९, सिद्धेश्वर हुक्केडाँडामा अवस्थित श्री सिद्धेश्वर माध्यमिक विद्यालय र विद्यालयले सञ्चालन गरेको छात्रावासको निरीक्षण गर्नुभयो। वि.सं. २०१८ सालमा स्थापना भएको उक्त विद्यालयमा हाल २१० जना विद्यार्थी अध्ययनरत छन्।
