आगामी फागुन २१ गते हुने प्रतिनिधिसभा सदस्य निर्वाचनका लागि बैतडीमा मतदाता नामावलीमा दर्ता गराउनेको संख्या उत्साहजनक देखिएको छ।
जिल्ला निर्वाचन कार्यालयका अनुसार असोज ९ गतेदेखि सुरु भएको नामावली संकलन तथा अद्यावधिक अभियानअन्तर्गत हालसम्म ६१८ जनाले नाम दर्ता गराइसकेका छन्, जसमा २०१ महिला र ४१७ पुरुष छन्।
बाहिरी जिल्लाका दुई महिला र सात पुरुषको पनि नाम दर्ता भएको छ। यसअघि बैतडीमा एक लाख ६१ हजार ३१२ जनाको नाम दर्ता भइसकेको तथ्यांक छ। निर्वाचन आयोगले अनलाइनमार्फत विवरण भर्ने र कार्यालयमा फोटो तथा फिङ्गरप्रिन्ट दिएपछि दर्ता प्रक्रिया पूरा हुने व्यवस्था गरेको छ।
सोह्र वर्ष पूरा भई नागरिकता प्राप्त गरेका नागरिकले नाम दर्ता गर्न सक्ने र मताधिकार प्रयोगका लागि १८ वर्ष पूरा हुनुपर्ने कार्यालयले जनाएको छ।
