कैलालीको चुरे गाउँपालिकामा राष्ट्रिय महिला सामुदायिक स्वास्थ्य स्वयंसेविका दिवस–२०८२ विविध कार्यक्रम सहित भव्य रूपमा मनाइएको छ।
चुरे गाउँपालिकाको आयोजनामा र फाया नेपाललगायत विभिन्न निकायहरूको सहकार्यमा सम्पन्न कार्यक्रममा स्वयंसेविकाहरूको निस्वार्थ सेवाप्रति सम्मान प्रकट गर्दै न्यानो कपडा वितरण समेत गरिएको थियो।
“स्वस्थ समुदायको निर्माण, महिला सामुदायिक स्वास्थ्य स्वयंसेविकाको योगदान” भन्ने नाराका साथ मनाइएको कार्यक्रममा अध्यक्ष चक्र बोगटी, उपाध्यक्ष धना थापा, वडा नं. ६ का अध्यक्ष प्रेम साउद, फाया नेपालकी अध्यक्ष गोमा आचार्य, पालिका स्तरीय स्वयंसेविका सञ्चालिका प्रमुख तिलसरी थापा तथा विभिन्न वडाका स्वयंसेविकाहरूको उल्लेखनीय उपस्थिति थियो।
फाया नेपालकी अध्यक्ष गोमा आचार्यले चुरे जस्तो भौगोलिक रूपमा चुनौतीपूर्ण क्षेत्रमा स्वास्थ्य सेवा सहज बनाउन संस्था निरन्तर सक्रिय रहेको बताइन्। उनले १६ दिने लैङ्गिक हिंसा विरुद्धको अभियानमा समेत सक्रिय सहभागिता जनाउँदै महिलामाथि हुने हिंसा बदलिँदो स्वरूपमा रोकथाम र सचेतनाको आवश्यकता रहेको धारणा राखिन्।
वडा नं. ६ का अध्यक्ष प्रेम साउदले घर–घरमा पुगेर स्वास्थ्य सेवा पुर्याइरहेका स्वयंसेविकाहरूले स्वास्थ्य सूचक सुधारमा महत्वपूर्ण योगदान पुर्याएको बताए। उपाध्यक्ष धना थापाले दुर्गम क्षेत्रमा निस्वार्थ सेवामा सक्रिय स्वयंसेविकाहरूको मेहनत सदैव अविस्मरणीय रहने उल्लेख गरिन्।
कार्यक्रमका प्रमुख आकर्षणमा पालिका अध्यक्ष चक्र बोगटीले ‘स्वयंसेविका कोष’ स्थापना गर्ने महत्वपूर्ण घोषणा रहेकाे थियो। अबदेखि सेवानिवृत्त स्वयंसेविकालाई एकदेखि डेढ लाख रुपैयाँसम्म उपलब्ध गराइने उनले बताए। अहिलेसम्म आफूहरू उचित रूपमा मूल्याङ्कन नपाएको बताउँदै तिलसरी थापाले यातायात र प्राविधिक सहयोगको अभाव अझै चुनौती हुने उल्लेख गरिन्।
समग्रमा, कार्यक्रमले स्वास्थ्य सेवा विस्तारमा महिला स्वयंसेविकाको अमूल्य योगदानलाई उजागर गर्दै प्रोत्साहन र सम्मानको वातावरण निर्माण गर्यो।
