🚍 सार्वजनिक यातायातमा आमूल सुधारको लागि गगन थापाको घोषणा, एकीकृत प्राधिकरणको अवधारणा अघि सारियो

गगनकुमार थापा ले सार्वजनिक यातायात सुधारका प्रारम्भिक योजनाहरू सार्वजनिक गरेका छन्। शुक्रबार राति सामाजिक सञ्जालमार्फत भिडियो सन्देश जारी गर्दै उनले यातायात क्षेत्र सुधारका लागि एकीकृत प्राधिकरण गठनको अवधारणा अघि सारेका हुन्।

सरकार, सार्वजनिक निकाय र निजी क्षेत्रबीच सहकार्यमार्फत व्यवस्थित सेवा सञ्चालन गर्नुपर्ने उनको भनाइ छ। सार्वजनिक यातायातबाट सर्वसाधारण गम्भीर रूपमा प्रभावित भए पनि आवश्यक प्राथमिकता र संवेदनशीलता नदेखिएको उनले उल्लेख गरे।

थापाले सार्वजनिक यातायातलाई सुरक्षित, भरपर्दो र व्यवस्थित बनाउन व्यापक सुधार अपरिहार्य रहेको बताए। उनका अनुसार साना तथा अव्यवस्थित सवारीमा निर्भर प्रणाली, एकीकृत नभएको रुट परमिट र भाडा संरचना तथा राजधानीमै कामकाजी नागरिक समयमै कार्यालय पुग्न नसक्ने अवस्था प्रमुख समस्या हुन्।

“घण्टौँको जाम, सडकमा उड्ने धुलो र असुरक्षित यात्रा अहिलेको यथार्थ हो,” उनले भने, “यसको अन्त्यका लागि ठोस तयारीका साथ अघि बढिरहेका छौँ।”