काठमाडौंः मोबाइल सेवाप्रदायक एनसेलले आफ्ना ग्राहकहरूका लागि आकर्षक डिजिटल अफर सार्वजनिक गरेको छ, जसअन्तर्गत प्रयोगकर्ताले दैनिक निःशुल्क १०० एमबी डेटा प्राप्त गर्न सक्नेछन् भने साप्ताहिक रूपमा ५० जीबीसम्म डेटा जित्ने अवसर समेत पाउनेछन्। कम्पनीले ग्राहक अनुभवलाई थप सुधार गर्ने र डिजिटल सेवाप्रति आकर्षण बढाउने उद्देश्यसहित यो योजना सञ्चालनमा ल्याएको हो।
यो अफर प्रयोग गर्न सबै एनसेल ग्राहकहरूले आफ्नो मोबाइलमा रहेको एनसेल एप खोलेर “बाइ प्याक” मेनुमा गई दैनिक १०० एमबी निःशुल्क डेटा सक्रिय गर्न सक्नेछन्। यस सुविधाले प्रयोगकर्तालाई एपमार्फत सजिलै विभिन्न सेवा उपयोग गर्न र निरन्तर अनलाइन रहन सहयोग गर्ने कम्पनीले जनाएको छ।
एनसेल एपलाई कम्पनीले एकीकृत डिजिटल प्लेटफर्मका रूपमा विकास गरेको छ, जसमा रिचार्ज, डेटा तथा भ्वाइस प्याक खरिद, ग्राहक सेवा सुविधा तथा विभिन्न मनोरञ्जनात्मक गेमहरू एकै स्थानमा उपलब्ध छन्। यसले ग्राहकलाई छिटो, सहज र प्रभावकारी डिजिटल अनुभव प्रदान गर्ने लक्ष्य लिएको छ।
यसैबीच, एनसेलले ‘प्ले एन्ड वीन’ नामक गेमिङ अभियान पनि सञ्चालनमा ल्याएको छ। यसअन्तर्गत ग्राहकहरूले एपमा उपलब्ध स्पिन द ह्वील, म्याथ च्यालेन्ज, एनसेल रनर तथा स्क्राच एन्ड वीन जस्ता गतिविधिमा सहभागी भई अंक संकलन गर्न सक्छन्।
साप्ताहिक अंकको आधारमा ग्राहकहरूको र्याङ्क निर्धारण गरिनेछ र कुल ३,४१० जना प्रयोगकर्ताले विभिन्न आकारका डेटा पुरस्कार प्राप्त गर्नेछन्। शीर्ष १० विजेताले जनही ५० जीबी डेटा जित्नेछन् भने त्यसपछि क्रमशः १० जीबी, ५ जीबी, १ जीबी, ५०० एमबी र १०० एमबीसम्मका पुरस्कारहरू वितरण गरिनेछ।
कम्पनीका अनुसार यो योजना डिजिटल समावेशीकरणलाई प्रवर्द्धन गर्ने र ग्राहकलाई अझ सक्रिय रूपमा डिजिटल सेवामा सहभागी गराउने दीर्घकालीन रणनीतिको हिस्सा हो। दैनिक निःशुल्क डेटा र गेमिङमार्फत ग्राहकलाई थप संलग्न गराउँदै एनसेलले डिजिटल पहुँचलाई सरल, आकर्षक र सबैका लागि पहुँचयोग्य बनाउने लक्ष्य राखेको छ।
