अत्तरिया: नेपाली कांग्रेस ले देशभर सञ्चालन गरिरहेको ‘जरा अभियान’ सुदूरपश्चिम प्रदेशमा अपेक्षाअनुसार प्रभावकारी बन्न सकेको देखिएको छैन। अछाम जिल्लाको बान्निगढी–जयगढ गाउँपालिका मा हालै सम्पन्न कार्यक्रमले अभियानको कमजोर उपस्थितिलाई उजागर गरेको छ।
केन्द्रीय प्रतिनिधि लेखराज जोशी को उपस्थितिमा आयोजना गरिएको कार्यक्रम भए पनि जनसहभागिता अत्यन्त न्यून रह्यो। स्थानीयस्तरमा पर्याप्त प्रचार–प्रसार र सक्रियता अभावका कारण कार्यक्रम औपचारिकतामै सीमित भएको सहभागीहरूले बताएका छन्।
कार्यक्रममा सहभागी नेताहरूका अनुसार गाउँपालिकाभित्रै कांग्रेसमा गुटगत प्रभाव प्रस्ट देखिएको छ। विशेषगरी शेरबहादुर देउवा समूहको पकड बलियो रहँदा अन्य समूहका कार्यकर्ताहरू अभियानप्रति खासै उत्साहित देखिएका छैनन्। यसले अभियानको प्रभावकारितामा प्रत्यक्ष असर पारेको विश्लेषण गरिएको छ।
स्थानीय तहमा पार्टीका संगठनात्मक संरचना निष्क्रिय जस्तै देखिनु, कार्यकर्तामा उत्साहको कमी हुनु र अभियानको उद्देश्यबारे स्पष्ट जानकारी नपुग्नु जस्ता कारणले जनसहभागिता कमजोर भएको बुझाइ छ। यसले ‘जरा अभियान’ को प्रभाव विस्तारमा चुनौती थपेको छ।
अछाम मात्र नभई सुदूरपश्चिमका अन्य जिल्लाहरूमा समेत अभियान सुस्त गतिमा रहेको बताइन्छ। केन्द्रबाट निर्देशन आए पनि प्रभावकारी कार्यान्वयन हुन नसक्दा अपेक्षित उपलब्धि हासिल हुन सकेको छैन। यस अवस्थाले पार्टीभित्रको समन्वय र संगठन सुदृढीकरणमा थप प्रयास आवश्यक रहेको संकेत गर्दछ।
